9-августдиз Махачкъалада Сергей Меликован регьбервилик кваз жуьреба-жуьре миллетринни­ динрин арада алакъайрин жигьет­дай кардик квай Советдин заседание кьиле фена.

Къейдна кIанда, мярекат, адет тирвал, жавабдар ксари докладар авуналди сергьятламиш хьанач, ам чан алай суьгьбетдиз элкъвена: сада-садаз суалар гузвай, къара­гъарнавай месэлайриз талукь теклифар веревирдзавай, меслятарзавай… Иштиракчийрин арада, Советдин членрилай гъейри, региондин министерствойринни ведомст­войрин, муниципалитетрин кьилери, жемиятдин ва диндин тешкилат­рин векилри иштиракна.

Заседанидин эвел кьиляй С. Меликова къейд авурвал, Дагъустан, миллетрин, жуьреба-жуьре динрал амалзавайбурун арада авай ала­къайрал гьалтайла, надир чешне я. «Дагъустанвийри я чIаларин, я динрин арада авай тафаватлувилери миллетрин садвилиз, ислягьвилиз манийвал тагузвайди асиррин тарихдалди субутнава», — лагьана ада.

Мярекатдин иштиракчийри веревирд авур асул месэлайрикай сад гзаф кьадар инсанар кIватI жезвай чкайра, диндин идарайра хатасузвал таъминарунихъ галаз алакъалу тир. Сергей Меликова гьукумдин жавабдар органрал диндин идарайра — мискIинра, килисайра — терроризмдин вилик пад кьунин герек тир серенжемар кьабулун тапшурмишна. Малум хьайи­вал, алай вахтунда регионда диндин са агъзурдалай виниз идараяр кардик ква, амма абурукай анжах 63 объектди хатасузвилин паспортар туькIуьрнава. Ихьтин паспортар туькIуьриз тахьунин кьилин себеб­рикай сад тайин тир идарадиз талукь документар къайдадик тахьун ва ам къанун-къайдадив кьазвайвал РФ-дин юстициядин министерстводин Дагъустанда авай отделенида регистрация тавун я.

Миллетрин, жуьреба-жуьре динрал амалзавайбурун арада  алакъаяр мягькемарун патал кьиле тухузвай кIвалахдикай гегьеншдиз РД-дин милли сиясатдин ва динрин крарин рекьяй министр Энрик Муслимова ихтилатна. Региондин МВД-дин кьил Абдурашид Мегьамедова республикада хаталу гьалар, дуьшуьшар арадал татун, экстремизмдинни терроризмдин идеологиядин­ вилик пад кьун патал министерст­води еке кIвалах кьиле тухузвайди къейдна.

Заседанидин сергьятра аваз, Россиядин Игит Темирлан Абутали­мов, РД-дин жегьилрин крарин рекьяй министр Камил Саидов, обра­зованидин ва илимдин министр Ягья Бучаев, медениятдин министр Зарема Бутаева, физический культурадин ва спортдин министр Сажид­ Сажидов, РД-дин Халкьдин­ Соб­ранидин депутат Абдусалам Гьадисов, республикадин муфтий Агьмад Абдуллаев, кешиш Павел Каликин, Дагъустанда авай чувуд­рин жемиятдин Советдин председатель Валерий Дибияев ва масабур рахана.

Гегьеншдиз РД-дин Кьилин сайтдай кIелиз жеда.

Агьмед  Магьмудов