Дагъустан Республикадин Кьил Сергей Меликова региондин йикъан месэлайриз талукьарнавай совещание кьиле тухвана. Абурук агьалияр чимивилелди, чи­ми целди, экуьналди таъминарунин ва ко­ронавирусдиз акси серенжемрал амал авунин месэлаяр квай.

Сифте нубатда яз РД-дин регион идара ийидай  центрадиз 23-ноябрдилай 13-декабрдалди атай арзайра къалурнавай кар алай месэлаяр ва абур гьялдай серен­жемар веревирдна. Ре­гиондин Центрадин регьбер Мегьамедсултан Абдуралимова хабар гайивал, винидихъ къалурнавай вах­тунда республикадин агьалийрилай 3 агъзурдалай виниз ар­заяр атана. Абурун чIехи пайни — Ма­хач­къа­ла, Каспийск, Дербент ва Хасавюрт ше­гьер­рай. Агьалийри гзафни-гзаф экв, къайи яд тахьуникай государстводи гузвай социаль­ный куьмек агакь тийизвайдакай ва тайин тир пособияр гун геже твазвайдакай шикаятзава.

“Винидихъ къалурнавай 20 йикъан муддатда центрадин аналитикри къурху кутазвай 20-далай виниз хабарар вере­вирд­на. Къейд авун лазим я хьи, кьуьд мукьвал жезвайвиляй агьалийрик энергетикадин комплекс авай гьалди секинсузвал кутазва. Мукьвал-мукьвал эквер хкудзавайвиляй, яд агалзавайвиляй Махачкъала шегьердин агьалийри наразивал ийизва”, — лагьана М.Абдуралимова.

Къейд авурвал, сетдикай менфят ­къачузвайбуру шегьерда, общественный чкайра QR-кодар ишлемишуниз талукь яз гьяд йикъара волонтерри тухвай рейдерилай разивалзава. Агьалийри гьакI и жуь­редин рейдер общественный транспортдани тухун теклифзава.

Социальный пулар геж гунин месэладиз талукь яз Дагъустандин Кьили РД-дин зегьметдин ва яшайишдин рекьяй ви­лик финин министерстводин руководст­водивай гъавурда тун истемишна. 3 йи­салай 7 йисалди тир аялриз пулар гуниз талукь яз министрдин сад лагьай заместитель Ибрагьим Зайналлаева къейдна хьи, федеральный бюджетдай ахъайнавай вири пулар лазим ксарив агакьарна. ЯтIани, 600 миллион манат кьван бес жезвач. Республикадин Кьили министерстводин векилдин рикIел хкана хьи, Дагъустандин агъзурралди хизанрин гьал-агьвал хъсанарунин месэла гъилевай йисуз са шумудра къарагъарайди я.

Къаякент райондин агьалийри муниципалитетда вакцинация авун тешкилунин гьалдиз талукь яз авур арзайрин гьакъиндай малумат райондин администрациядин кьилин заместитель Гега Агьмедовади гана. Ада лагьайвал, агьалийри чпиз “Спутник Лайт” раб ягъун истемишзавай. Амма и жуьредин препарат чкадал алачир. Гила и месэла гьялнава.

РД-дин регион идара ийидай Центрадиз атай арзаяр веревирд авун куьтягьуналди, Дагъустан Республикадин Кьил С.Меликова агьалийрилай къвезвай гьар са арзадив мукьуфдивди эгечIун истемишна. “Республикадин властдин органрин ва муниципалитетрин руководителриз мад сеферда лугьузва: Дагъустандин ЦУР-диз къвезвай гьар са арзадиз, хабардиз вахтунда килиг ва герек серенжемар кьабула”, — лагьана региондин Кьили.

РД-дин мулкуна коронавирусдин инфекция чукIунин вилик пад кьунин жигьет­дай кардик квай Оперативный штабди мо­ниторингдин нетижайрикай малумат гана.

РД-дин Гьукуматдин Председателдин заместитель Мурад Къазиева лагьайвал, РД-дин промышленностдин ва алишверишдин министерстводи Дагъустандин предпринимателрихъ, шегьеррин ва районрин администрацийрихъ, Роспотребнадзордин РД-да авай Управленидихъ ва МВД-дихъ галаз санал алишверишдин ва общественный тIуьнрин идарайрин коллективрин арада  талукь Указдин истемишунрал амалдайвал гъавурдик кутунин кIва­лах тухузва. Гьа са вахтунда алишве­ришдин ва общественный тIуьнрин идарайра QR-код ишлемишзавай къайдадиз талукь яз ахтармишунин серенжемарни кьиле тухузва. Малум хьайивал, иллаки алишверишдин центрайра Роспотребнадзордин истемишунрал амалзавач. 17-ноябрдилай къенин йикъалди, закондал амал тавуниз килигна, административный 488 протокол кхьенва.

Алай йисан декабрдин сифте кьилера РД-дин Гьукуматдин Председателдин Сад лагьай заместитель Батыр Эмееван гуьзчивилик кваз алишверишдин идараяр мадни ахтармишна. Дуьздал акъуднавай чIурувилерин гьакъиндай чарар РД-дин МВД-диз рекье тунва.

Алай йисан 13-декабрдиз Дагъустандин предпринимателрин идаради РД-дин промышленностдин ва алишверишдин министерстводихъ, РД-дин карчийрин их-тиярар хуьнин рекьяй векилдихъ ва Ма­хачкъала, Каспийск шегьеррин администрацийрихъ галаз санал карчийрин сообществодин ва алишверишдин центрайрин руководителрихъ галаз гуьруьш кьиле тухвана. РД-дин рекъемрин министерст­вода “Рекъемрин волонтер” гьерекат кардик кутунва. Республикадин вузрин ва ссузрин студентри алишверишдин центрайрин коллективриз QR-кодар ахтармишунин карда куьмекар гудайвал я. РД-дин жегьилрин крарин рекьяй министерстводин волонтеррини чка-чкада рейдер кьиле тухузва.

Мурад Къазиеван гафаралди, эхиримжи гьафтейра гьалар са кьадар хъсанвилихъ элкъвенва. Виликдай ахтармишунар кьиле тухвай алишверишдин хейлин центрайри муьштерияр QR-код ахтармишиз ахъайзава.

Дагъустандин Кьили алишверишдин чIехи объектрин иесийрихъ галаз гуьруьшар кьиле тухун ва абур гъавурда тун ис­те­­мишна. Ада лагьайвал, алай вахтунда Да­гъустанда тIугъвалдик начагъ жезвайбурун кьадар сагъ хъжезвайбурулай гзаф я.

«Лезги газет»