И йикъара чи арадай азаддиз кьуршахар кьунай СССР-дин спортдин мастер, ДГТУ-дин профессор Сулейман Абдурагьимович Эфендиев акъатна.С.А.Эфендиев Махачкъалада дидедиз хьана. Гуьгъуьнлай хизан бубайрин Ватандиз — Ахцегьиз куьч хъхьана. 14 йисан яшда авайла, кIелунар дагъвийрин интернатда давамарун патал ам Каспийскдиз атана.
1953-йисуз ам ДГУ-дин (гьа чIавуз — ДГПИ) къецепатан чIаларин факультетдик экечIна. Университет акьалтIарайдалай кьулухъ ам Каспийск шегьердин 2-нумрадин мектебда ингилис чIалан муаллим яз кIвалахал акъвазна. Са тIимил вахт арадай фейила ам Ленинграддин гимияр эцигдай институтдин Дагъустанда ахъайнавай филиалдиз хъфена.
Гуьгъуьнлай С.А.Эфендиева кIвалах ДГТУ-да давамарна. И вузда ада 50 йисалай виниз девирда зегьмет чIугуна.
Жегьилриз чирвилер гун ва спорт — и кьве рехъ Сулейман Эфендиеван уьмуьрда кьилинбуруз элкъвена. Спортдин рекье адахъ еке агалкьунар хьана: са шумуд сеферда Урусатдин ва Дагъустандин чемпион, СССР-дин спартакиададин гъалибчи, азаддиз кьуршахар кьунай, самбодай СССР-дин спортдин мастер.
Жегьилар спортдал рикI алаз тербияламишунизни ада кьетIен фикир гузвай. С.Эфендиевавай спортдин сирер чирай гзаф кьадар дагъустанвийрикай машгьур чемпионар хьана. Адан зегьметдиз гьуьрмет авунин лишан яз, ДГТУ-дин спортдин зал Сулейман Абдурагьимовичан тIварунихъ янава.
С.Эфендиев РД-дин Общественный Палатадин сад лагьай созывдин член, ДГТУ-дин ректордин меслятчи (советник), Каспийск, Махачкъала, Дербент шегьеррин, Ахцегьрин хуьруьн гьуьрметлу гражданин тир.
Образованидин хиле яргъал йисара гьакъисагъвилелди зегьмет чIугунай ам “СССР-дин образованидин лайихлу къуллугъчи”, “РСФСР-дин лайихлу муаллим” тIварариз, Гьуьрметдин Ордендиз, цIудралди дипломризни грамотайриз лайихлу хьана.
Сулейман Эфендиев лезги халкьдин чIалахъ, культурадихъ, хайи чилихъ рикI кузвай чIехи ватанперес, кьегьал хва тир. Чи газетдихъ галазни ада гьамиша алакъа хуьзвай. Милли мярекатрал, гуьруьшрал ада камаллу меслятар, насигьатар гудай. Куьмек герек яз вичин патав атай гьар са лезгидиз ада гъил яргъи ийидай. Гьавиляй адахъ еке гьуьрметни, кесерни авай.
“Лезги газетдин” редакциядин коллективди Сулейман Абдурагьимович Эфендиев рагьметдиз финихъ галаз алакъалу яз, адан хизанриз, багърийриз башсагълугъвал гузва.
