Яран сувар мубаракрай!

Алатай гьафтеда Махачкъалада, М.Горькийдин тIвару­нихъ галай Урусрин драмтеатрдин вилик квай майдандал, Дагъларин уьлкведин халкьари гатфарихъ галаз алакъалу Яран сувар шад гьалара къейдна. Мярекатда Дагъустандин исполнительный гьукумдин, диндин ва общественный кIватIалрин векилри, шегьерэгьлийри, умуми чирвилер гудай идарайрин аялри ва муаллимри, вузрин ва ссузрин, гьакI маса уьлквейрай тир студентри, меркездин мугьманри  иштиракна.

РД-дин милли политикадин ва диндин крарин рекьяй минис­терстводин куьмекни галаз суварин мярекат тешкилайди Махачкъала шегьерда кардик квай азербайжанвийрин милли культу­радин автономия тир. Мадни суварин мярекатда Дагъустан Республикадин Халкьдин Собранидин милли политикадин, жемиятдин ва диндин кIватIалринни парламентрин арада алакъайрин Комитетдин председатель Фирудин Ражабова, Дагъустандин гьуку­матдин миллетрин арада рафтарвал, общественный тешки­лат­рихъ ва массовый информациядин такьатрихъ галаз кIвалах ала­къа­лу авунин рекьяй отделдин начальник Наталья Евсеевади, РД-дин Общественный палатадин гражданвилин общество къайдада тунин ва  агьалийрин ихтиярар хуьнин рекьяй Комиссия­дин председатель Ислам Мегьамедова ва маса ксари иштиракна.

Мярекат ачухай РД-дин милли политикадин ва диндин крарин рекьяй министр Энрик Муслимова  кIватI хьанвайбуруз, гьакI республикадин вири агьалийриз гатфарин сувар тебрикна.

— Яран сувари, гатфарин, шадвилин ва руьгьдин цицIивилин ярж яз, инсанар агудзава, ислягь, хушбахтлу, экуь гележегдихъ умудлувал гузва. Къенин юкъуз чун, республикадин вилик акъвазнавай важиблу месэлаяр кьилиз акъудиз, региондин кьиле авай ксарин, гьакIни дагъустанвийри игитвални кьегьалвал къалурзавай военный махсус серенжем намуслудаказ, лайихлуда­каз кьилиз акъудун патал уьлкведин Верховный Главнокомандующийдин  патав тупламиш хьана кIанда, — къейдна министрди.

Микрофондихъ атай  азербайжанвийрин милли культурадин автономиядин председатель Ракиф Азизовани сувар тебрик авунин чими келимаяр лагьана. Гзаф миллетар яшамиш жезвай Дагъларин уьлкведа Яран сувари къадим культурадин адетар хуьз куьмекзавайди, халкьарин арада асирралди дуствилин, стхавилин алакъаяр хуьнин чешне къалурзавайди къейдна.

Суварин мярекатдин сергьятра аваз, чи республикадин районрайни шегьеррай атанвай яратмишунардай коллективри ва артистри кьуьлералди ва манийралди кIватI хьанвайбурун гуьгьуь­лар хкажна.

Чи мухбир