—           Родос Грециядин виридалайни гуьрчег остров­рикай сад я.

—           Родос островдин къерехар рагъакIидай патай Эгейский гьуьлуь, рагъэкъечIдай патай Средиземный гьуьлуь кьунва.

—           ЧIехивилел гьалтайла, Грециядин островрикай Родос 4-чкадал ала. Адан умуми майдан 1398 квадратный километрдикай ибарат я.

—           Родос островда тахминан 120 агъзур кас яшамиш жезва.

—           Островдин администрациядин центр Родос шегьер я. Ана 60 агъзурдалай виниз агьалияр яшамиш жезва. И гъвечIи шегьер цавун кIаник квай музейдиз элкъвенва.

—           Родос шегьер дуьньядин 7 аламатдикай сад (Ко­лосс Родосский) ана аваз хьуналди, гьакIни ЮНЕСКО-дин къадим девиррин гзаф кьадар памятникралди машгьур я.

• Колосс Родосский чи девирдал къведалди 292-йисуз эцигна, чи девирдал къведалди 226-йисуз ам залзаладин нетижада терг хьана. Колосс гьихьтинди ва ам гьина авайди тиртIа, гьакъикъатда садазни чизвач. Адан кьакьанвал 36 метрдикай ибарат тир.

—           Родос остров неинки туристри, гьакI алимрини еке итиж ийизвай чка я. Анаг археологиядин памятникралди девлетлу я. Ана чиликай сур девирдин затIар хкудун патал датIана эгъуьнунар кьиле физва.

—           Родос островдин Линдос шегьерда олимпиада­дин майдан ава. Ам къадим заманадин Олимпиядин майдандиз тешпигь я. Ахьтин майдан мад санани авач.

—           Родос островда инсанар яшамиш жезвай 44 чка ава, абурун чIехи пай хуьрер я.

—           Родосда Чепелукьрин дере лугьудай чка ава. Ана гьа са жуьредин чепелукьар миллионралди жеда.

—           Родосдиз зумруддин островни лугьузва. Анин мулкарин 37 процент кипарисрини шамагъажри кьунва. Цавай килигайла, остров булдалди зумрудар кIвах­на­вай живописдин майдан хьиз аквазва.

—           “Родос” гафунихъ “цуьк акъудзавай” лагьай мана ава.

—           Родосдиз ракъинин островни лугьузва. Ана гьа­къикъатдани йиса 300 юкъуз чими ва рагъ авай гьава жеда.

«Лезги газет»