Сулейман-Стальский районда жуьреба-жуьре къуллугърал гьакъисагъвилелди зегьмет чIугвазвай инсанар гзаф ава. Ахьтинбурукай сад Абдулжабар Мирзехановни тир.
Яргъал йисара райондин чирвилер гудай идарайрин кьилин бухгалтердин везифаяр тамамарай адан бине Ахцегь райондин Грарин хуьр я. Ахцегьрин юкьван мектеб акьалтIарайдалай кьулухъ ада “Луткунский” совхозда кIвалахна. 1976-йисуз А.Мирзеханова Орджоникидзедин Горный институт акьалтIарна ва жуьреба-жуьре майишатра кьилин бухгалтер яз зегьмет чIугуна.
Сулейман-Стальский райондин чирвилер гудай идарайрин кьилин бухгалтер яз ада 1990-йисалай кIвалахзавай. И йисара ада жемятдин, райондин муаллимрин, санал кIвалахзавай юлдашрин арада вичикай хъсан пешекардикай, тешкилатчидикай, къени инсандикай хьиз фикир туна.
Абдулжабар Мирзеханова чешнелу хизанни арадал гъана. Къе адан веледри уьлкведин жуьреба-жуьре шегьерра чпин пешейрай намуслувилелди кIвалахзава.
Сагъламвал еке девлет я гьавайда лугьузвач. Гьайиф хьи, сагъламвал зайиф хьун себеб яз гзаф инсанар вахтсуз рагьметдиз физва. Абдулжабар Мирзехановни уьмуьрдай 66 йисан яшда аваз хъфена. Къе ам чи арада амачтIани, адан тIвар мукьва-кьилийрин, хуьруьн жемятдин, санал кIвалахай юлдашрин рикIера ама.
Чи мухбир
