“Лезги газетдин” 21-февралдиз акъатнавай 8-нумрада, “ТIварцIиз кутугай коллектив” кьил гана, “Кьасумхуьруьн далдамчияр” ансамблдикай макъала чапнава. Сулейман-Стальский райондин 90 йисан юбилейдиз гьазурвилер аквазвай и арада адакай газет кIелзавайбуруз хабар гун хъсан кар я. Мектебра кIелзавай аялар, жегьилар, медениятдин хиле кIвалахзавайбур патал — иллаки. Гьавиляй заз а ансамблдин бине кутур, ам арадиз акъудай коллективдин иштиракчийрикай куьрелди суьгьбет давамариз кIанзава…
Кьасумхуьрел ва адалай яргъарани Кьасумов Ифрат виридаз сейли, гьуьрметлу кас тир (рагьмет хьурай вичиз). Ансамбль арадал гъайиди гьам я. Адахъ кьуьлердай, далдам, тафт ягъунин рекьерайни еке бажарагъ авай. Ада хуьрерай бажарагълу жегьилар жагъурна, алакьунар авайбур тупламишна, ансамбль арадал гъана. Курхуьруьн мектебда кIвалахай немс чIалан муаллим Къурбанов Зубаил (заз ада тарсарни гайиди я), КIварчагъай — Селимов Умар, Агъа СтIалдилай — Борис, Абдулаким, Кьасумхуьрелай — Смяли, Къайиб, Кьасумов Ифрат вич, Гьажимисриев — Аламишедай (гила Эминхуьр) и ансамблдин иштиракчияр тир. Чна винидихъ тIвар кьунвай макъалада, авторди ансамблдин лайихлувилер къейднава, абур тикрарунин лазимвал авач. Амма важиблу са делилдикай талгьанани жедач. Москвада Дагъустандин йикъарин декада кьиле физвайла, далдамчийрин ансамблди Кремлдин Съездрин дворецда Дагъустандин макьамрикай ибарат концерт ганай. Устадвал къалурай абуруз тамашачийри, яргъал чIугур капар ягъуналди, чпин разивал къалурнай… Далдамчийрин устадвиликай а вахтара кесерлу журналрикай сад яз хьайи “Огонёкдин” чинра тарифлу кхьинрилай гъейри, еке шикилни галаз макъала чапнай. Гуьрчегдиз акъатнавай шикилдай гьинал вуж ацукьнаватIа, вири хъсандиз чир жезвай. Амма, гьайиф хьи, шикилдин кIаник Кьасумхуьруьн далдамчияр ваъ, Сергокъаладинбур яз кхьенвай. И кардин патахъай за журналдин редактор А.Н.Гушинан тIварунихъ наразивилин чар кхьенай. Энгел тавуна, анай чухсагъулдин, разивилин келимаяр авай чар хтанай. Чпин къуллугъчи гъалатI хьайиди ва адакай вахтунда хабар гунай заз кьилин редакторди сагърай лагьанай. Чар за архивда лап и мукьваралди хвенай, амма гила жагъун хъувунач. Чар за а чIавуз ансамблдин коллективдизни къалурнай.
Гила ансамбль цIийи хъувунва, гьелбетда, хъсан камар къачузва. Виликанбурукай 3 кас амай хьиз я. Амайбур рагьметдиз фенва. Агалкьунар хьурай жегьилрихъ.
Райсудин Набиев
