6-июндиз Махачкъалада Дагъустан Республикадин милли политикадин рекьяй сад лагьай министр Мегьамедсалигь Гусаев рикIел хкуниз талукь серенжем кьиле фена. М.Гусаев 2003-йисан 27-августдиз террориствилин гьерекатдин нетижада телеф хьайиди я.
РД-дин милли политикадин рекьяй министерстводин къуллугъчияр, багърияр, дустар М.Гусаеван тIварунихъ янавай куьчеда эцигнавай барельефдин вилик кIватI хьана.
РД-дин милли политикадин рекьяй министр Татьяна Гамалея рикIел хкайвал, сагъ яз амайтIа, алай йисуз Мегьамедсалигь Гусаеван 66 йис тамам жедай.
РД-дин Кьилин советник Деньга Халидова Мегьамедсалигь Гусаев Дагъустандин баркаллу рухвайрикай сад яз хьайиди, ада республикадин политический уьмуьрда активдаказ иштирак авурди, общественный тешкилатринни республикадин гьукумдин арада алакъа хуьнин роль агалкьунралди кьилиз акъудайди, М.Гусаев рикIел хкунин мярекатар кьиле тухун важиблу тирди къейдна.
“Россиядин халкьарин ассамблея” ДРО-дин региональный отделенидин председатель, РД-дин милли политикадин рекьяй сад лагьай министрдихъ галаз санал кIвалахай Зикрула Ильясован гафаралди, Мегьамедсалигь Гусаева республикадин милли политикадин дибар кутазвай девирда кIвалахна. Адан чалишмишвилерин нетижада арадал атай милли политикадин рекьяй министерство вични Кеферпатан Кавказда сад лагьайди тир.
Багьаудин Гусаева кIватI хьанвай вирибуруз стха рикIел хуьнай сагърай лагьана.
«Лезги газет»
