Вилик пад кьадай чараяр

Дагъустанда ОРВИ начагъвал артух хьанвайди къейднава. Идакай «Дагъус­тан» РГВК-дин телеграм-каналди хабар гузва.

Роспотребнадзорди начагъвилин вилик пад кьадай чараяр акуниз эвер гузва. Хабар гузвайвал, анжах эхиримжи гьафтеда уьзуьр­ галукьнавай 2000-далай гзаф дуьшуьшар хьанва, гьа са вахтунда начагъбурукай 60 процентдилай гзаф аялар я.

Роспотребнадзорди республикадин агьалийриз ОРВИ ва грипп гележегда­ чу­кIунин вилик пад кьун патал арадал атанвай гьалар фикирда кьуниз ва профилактикадин серенжемар вилив хуьниз эвер гузва.

Агьалийри къачунва

Сад тир пособие — аялар галай хизанриз ва кIвачел залан дишегьлийриз Яша­йишдин фондунин патай куьмек. Да­­­гъустанда алай йисуз 526 619 аялди­ ва кIвачел залан 25 772 дишегьлиди къачун­ва. Идакай Дагъустандин СФР-дин телеграм-каналди раижзава.

Хабар гузвайвал, сад тир пособие тIи­мил къазанжи къачузвай хизанриз гузва. И такьатар игьтияжвал авани, авачни чирун патал комплекснидаказ къимет гайи­далай кьулухъ тайинарзава — хизанриз­ ва кIвачел залан дишегьлийриз, агьалидал ацалтзавай юкьван гьисабдин къазанжи регионда тайинарнавай ПМ-дилай (прожиточный минимум) тIимил тир.

Къейдзавайвал, сад тир пособие анжах диде-бубаяр ва аялар РФ-дин агьалияр тир ва Россияда яшамиш жезвай дуьшуьшда къачуз жезва. Пособидин кьадар регондин ПМ-дин 50, 75 ва я 100 процентдикай ибарат я.

Хабар гузвайвал, эгер хизанда мад са аял дуьньядал атанваз хьайитIа ва гьа са вахтунда чIехи аялриз пособие гузватIа, и вахтунда цIийиз хьанвай чагъадиз и вып­лата гун патал арза кхьинин лазимвал авач. Ихьтин дуьшуьшда СФР-ди чагъадиз пособие, чIехи аялриз ам гузвай кьадарда проактивный жуьреда тайинарда.

Чешмеди раижзавайвал, пособие туь­кIуьрун патал диде-бубадиз госкъуллугърин порталда арза гун бес жезва. Амай делилар талукь идарайрай Яша­йишдин фондуни вичи къачузва.

Бегьер кIватI хъийизва

Дагъустанда прунздин бегьер кIватI хъийиз эгечIнава. Идакай РД-дин хуьруьн майишатдин ва недай суьрсетдин телерам-каналди раижзава.

Къейдзавайвал, алай йисуз аграрийрин вилик 25 000 (къанни вад агъзур) гектардай «лацу техил» кIват хъувунин везифа акъвазнава.

Алай вахтунда гьеле саки 3 000 гектардай прунз кIватI хъувунва. Юкьван гьисабдин бегьерлувили тахминан 45 центнер тешкилзава.

Хабар гузвайвал, бегьер кIватI хъувунин жигьетдай гзафни-гзаф активнивал къалурзавай районрин арада ава:

— Къизляр, Бабаюрт, Тарумовский районар.

Къейдзавайвал, бегьер кIватI хъувун патал зегьметчийри хъсан гьава авай гьар са югъ ишлемишзава.

Мус элячIзава?

«Дагъустандин газдин объектар хъуь­тIуьн кIвалахдин режимдал мус элячI­за­ва?» суалдиз «Дагъустан патал газ» те­леграм-каналди жаваб гузва. Чешме­ди­ раижзавайвал, хкатунар авачиз газ ага­кьарун патал чимивилелди таъминар­дай­ муддатда (отопительный сезон)­ газдин­ сис­тема хъуьтIуьн режимдал алудзава, газ агакьа­рун гатун дережадилай­ хъуь­тIуьз ишлемишдай дережадив кьадай ре­къемдив агакьдалди артухарза­ва. Са режимдилай маса режимдал «элячIун» анжах агъадихъ галай шартIарикай сад вилив хвейла, ахпа кьилиз акъудун мумкин кар я:

къецепата суткада гьавадин юкьван гьисабдин чимивал 5 йикъан къене +8°C ва адалай тIимил тир дережада ава;

чимивилелди таъминардай сезон алукьнавайди малумарнава (чкадин гьукумдин органрин къарардалди);

чимивал гудай вахт алукьунихъ галаз алакъалу яз, газ ишлемишунин кьадар хейлин артух хьанвайла (малумат  гайила).

Гьазурайди — Муса  Агьмедов