26-мартдиз Дагъустан Республикадин Кьилин везифаяр вахтуналди тамамарзавай Сергей Меликова Гьукуматдин ва республикадин исполнительный властдин органрин кадрийриз талукь са жерге къарарар кьабулна. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Хушуналди арза кхьей Дагъустан Республикадин образованидин ва илимдин министр Омарова Уммупазиль Авадзиевна вичин вахтуналди тамамарзавай везифайрикай азадна. Дагъустан Республикадин образованидин ва илимдин министрдин везифаяр вахтуналди тамамарун Дагъустандин халкьдин майишатдин госуниверситетдин ректор Бучаев Ягья Гьамидовичал тапшурмишнава.
Дагъустан Республикадин эцигунрин министрдин везифаяр вахтуналди тамамарзавай Баглиев Малик Жамидинович вичин хушуналди алай къуллугъдикай азаднава. Дагъустан Республикадин эцигунрин министрвиле “Химиядин ва электроорганический соединенийрин илимдинни ахтармишунардай государственный институт” АО-дин капитальный эцигунрин рекьяй генеральный директордин заместитель Сулейманов Артур Абдулманафович тайинарнава.
Дагъустан Республикадин физический культурадин ва спортдин министр Мегьамедов Мегьамед Юсупович вичин хушуналди министрвилин къуллугъдикай азаднава. РД-дин физический культурадин ва спортдин министрвиле кьуршахар кьунин федерациядин президент Сажидов Сажид Халилрагьманович тайинарна.
“Вахтуналди тир” келима галачиз къуллугърал тайинарнава:
Муьгьуьдинова Изумруд Мужайевна — Дагъустан Республикадин зегьметдин ва яшайишдин рекьяй вилик финин министрвиле;
Беляева Татьяна Васильевна — Дагъустан Республикадин здравоохраненидин министрвиле;
Бутаева Зарема Ажуевна — Дагъустан Республикадин культурадин министрвиле;
Снегирев Сергей Владимирович — Дагъустан Республикадин рекъемрин жигьетдай вилик финин министрвиле;
Халилов Низам Рагьманович — Дагъустан Республикадин промышленностдин ва алишверишдин министрвиле.
“Вахтуналди тир” келима Дагъустан Республикадин Гьукуматдин Председателдин заместителар тир Къарибов Анатолий Шамсудиновичан ва Абдулмуслимов Абдулмуслим Муьгьудиновичан къуллугърихъни галамач.
Дагъустан Республикадин Кьилин куьмекчивиле Чинённая Тамара Юрьевна тайинарнава.
«Лезги газет»
