Дагъустандин властри алай йисуз “Зи Дагъустан — зи рекьер” проектдай, алишверишда кьенятнавай такьатрин гьисабдай алава яз, 40-дав агакьна рекьер ремонтда. Идан гьакъиндай 28-сентябрдиз региондин транспортдин ва рекьерин майишатдин министерстводин пресс-къуллугъди хабар гана.
“Дагъустандин Кьил Владимир Васильева рикIел гъайи “Зи Дагъустан — зи рекьер” проектдин сергьятра аваз, 2020-йисуз алишверишда кьенят авур такьатрин гьисабдай муниципальный 20 районда 39 объект ремонтда”, лугьузва малуматда.
Къейдзава хьи, кьенят авунвай такьатрин кьадар 93 миллионни 134 агъзур манатдиз барабар я. “Гьа и такьатрин гьисабдай алай йисуз регионда 20 километрдилай гзаф яргъивал алай 39 куьче ремонтда”, — лугьузва текстина.
Дагъустандин транспортдин ва рекьерин майишатдин министерстводин пресс-къуллугъдин делилралди, сифте винидихъ тIвар кьунвай проектдин сергьятра аваз 2020-йисуз 355 куьче ремонтда.
«Лезги газет»
