“Хатасуз ва ерилу автомобилрин рекьер” милли проект уьмуьрдиз кечирмишунин сергьятра аваз 0 — 4 километрдин участокда ремонтдин ва “Мамрач-Ташкапур — Аракандин муьгъ” автомобилрин 4 -10 километрда капитальный ремонтдин кIвалахар башламишнава. Идан гьакъиндай “Лезги газетдиз” РД-дин транспортдин ва рекьерин майишатдин министерстводин пресс-къуллугъди хабар гана.
Ремонтдин кIвалахар тамамарунин контракт гьеле алатай йисуз кутIуннавайди тир. Ам 2020-йисуз уьмуьрдиз кечирмишиз башламишна. И карди пландик кутунвай кIвалахар кьилиз акъуддай мумкинвал гуда.
И рехъ муниципальный пуд тешкилат — Сулейман-Стальский, Хив ва Агъул районар — Махачкъаладихъ галаз алакъалу ийизвай кьилин шегьре я.
0-4 километрдин участокда рекьин винел пад туькIуьрунин кIвалахар куьтягьнава, тротуарар туькIуьрунин, турбаяр ремонтунин кIвалахар кьиле тухузва.
Ремонтдин кIвалахар алай йисан июндин вацра куьтягьдайвал я.
4-10 километрдин участокда вахтуналди тир дараматар туькIуьрунин гьазурлухвилин кIвалахар кьилиз акъудна куьтягьнава. Яд къерехдиз акъуддай турбаяр цIийибуралди эвезунин, машинар фидай рекьин пай гьяркьуь авунин, рехъ электричестводин лампайралди ишигъламишунин кIвалахар башламишнава. Капитальный ремонтдин кIвалахар алай йисан октябрдиз куьтягьун пландик кутунва.
«Лезги газет»
