Эхиримжи вахтара РД-дин туристрин тешкилатри Ахцегь райондиз кьетlен фикир гузва. Районда марифатдин «Люминари», медениятдин, яшайишдин «Самур» маканар ва Хуьруьга край чирдайбурун музей ачухуникди, ял ядай багълар ва медениятдинни тарихдин метлеб авай дараматар цlийи хъувуникди Ахцегь райондиз туристри ийизвай итиж артух хьанва.
РД-дин туризмдин ва халкьдин художественный сеняткарвилин рекьяй министр Рабият Закавова Ахцегь райондин Кьил Осман Абдулкеримова марифатдин «Люминари» маканда къаршиламишна. Мугьманрин жергеда
РД-дин туризмдин ва халкьдин художественный сеняткарвилин рекьяй министерстводин Управленидин начальникдин заместитель Нариман Рамазанов, РД-дин «Туристрин информациядин «Дагъустан» центр» ГБУ-дин директор Къурбан Ражабов, СМИ-дин векилар ва масабур авай.
Осман Абдулкеримова мугьманар «Люминари» макандин кlвалахдихъ галаз танишарна. Мугьманар тарсар чирдай классриз, ктабханадиз, телескоп авай обсерваториядиз, лекторийдиз, кlелдайбурун залдиз, художественный ва хъсан крарин лабораторийриз килигна.
Арадал гъанвай къулайвилерни мумкинвилер акурла, мугьманар гьейран хьанвай. Абуру ихьтин зурба макан кардик кутур мергьяматлувилин «Просвещение» фондунин президент Магьмуд Абдулкеримоваз чухсагъул лагьана.
«Лезги газет»
