Республикадин здравоохраненидин министерстводин пресс-къуллугъди хабар гузвайвал, Махачкъалада коронавирусдиз акси рапар янавай, чпин яшар 60 йисарилай алатнавай агьалийриз гьавая недай-хъвадай суьрсет гузва.
Кьилди къачуртIа, мергьяматлувилин савкьатар рапар ягъун патал Е.Исинбаевадин тIварунихъ галай стадиондал, Урусрин театрдин, Аваррин театрдин, ДГМУ-дин Ленинан тIварунихъ галай майдандал алай дараматра кардик кутунвай пунктара гузва.
Къейд ийин хьи, мергьяматлувилин серенжем Дагъустандин Кьилин везифаяр вахтуналди тамамарзавай Сергей Меликован тапшуругъдалди кьиле тухузва. И карда РД-дин спортдин ва физический культурадин министерстводи, Махачкъаладин администрацияди, мергьяматлувилин “Михьи рикI” ва “Инсан” фондари иштиракзава.
Серенжем 20-сентябрдалди давам жеда ва ам коронавирусдиз акси рапар ягъун патал кардик кутунвай маса пунктарани тешкилда.
Чи мухбир
