Мегьамедзериф Гьажиеван  — 70 йис

13-декабрдиз Ахцегьрин Аскар Сарыджадин тIварунихъ галай искусстводин школадин залда и школадин директор, Россиядин художникрин ва дизайнеррин Союздин член, Карачаево-Черкесия республикадин лайихлу художник  Мегьамедзериф  Гьажиеван  яратмишунрин “Рангарин таъсирлувал” тIвар алай нубатдин выставка ачухна. Живописдин экспрессионизмдин къайдада чIугунвай 19 шикилдикай ибарат выставка авторди вичин 70 йисан юбилейдиз бахшнавай. Къейд ийин, художник хайи ватандиз хтана, искусстводин шко­ладин директорвиле кIва­лахиз хьайи кьве йисан къене им адан яратмишунриз талукьарна тешкилнавай 8-выставка я. Медениятдин мярекатда художникдин мукьва-кьилийри, ярар-дустари, ученикри ва ху­дожест­вен­ный искусстводин къадир авай, адал рикI алай ксари иштиракна. Выставка са вацра давам жеда.

РикIел алама, дуьз са йис вилик, 2021-йисан 12-декабрдиз, РФ-дин Конституциядин йикъаз талукь яз, Ахцегьа “Крымдинни Кавказдин рагъ” тIвар алай сифте выставка хьанай. М.Гьажиева вичин яратмишунрихъ галаз санал ана школадин аялрин гъилин кIва­ла­харни эцигнавай. Эхь, гьа и къайдада тежрибалу муал­лимди ва художникди вичин аялриз чпин алакьунрикай гегьенш къатариз хабар гудай майданар теклифзава.

Нубатдин выставкадиз талукьарнавай мярекат, художникдин уьмуьрдинни яратмишунрин рекьикай итижлу гаф рахуналди, Ахцегьрин тарихдин музейдин директор, РД-дин культурадин ла­йих­лу работник Низами Дагъларова ачухна.

— Лезгийрин вини дережадиз акъатай медениятдин макан хьайи, илимдин, искусстводин, спортдин, производстводин гьар жуьре хилерай зурба ксар акъатай Ахцегьа ихьтин мяркатар мукьвал-мукьвал кьиле тухун тIебии кар я. Мегьамедзериф лагьайтIа, чи машгьур Алирза Эмирбегов, Имамали Халилов, Шариф Шагьмарданов, Сияра Межидова, Октай Алирзаев хьтин бажарагърин жергедавай художник я, — къейдна ада вичин ра­хунра.

— …Зи виликан выставкайра куь вилик гъайи гзаф кIвалахар реализмдин къайдадинбур тиртIа, гила за квез гьат­та­ Дагъустанда сифте яз жуван экспрессио­низмдин стилда чIугунвай яратмишунар къалурзава, — лагьана, мярекатдин ишти­ракчийрихъ элкъвена  ра­хай­ М.Гьажиева. — Авангардный, яни умуми манадин, фи­кирдин вилик фенвай къайдадин яратмишунра зун экспериментироватиз алахъзава. Реализмдихъ галаз вер­диш инсанар, гьелбетда, ихьтин къайдадин шикилрин гъавурда гьамиша акьадач.

Художник тамашачияр вичин кIвалах­рин мана-метлебдин гъавурда тун патал “Чемпион по боксу”, “Буйство осени”, “Золотые недра наши”, “Позитив”, “Дикая орхидея”, “Чистилище”, “Чаша”, “Тишина ранней осени” шикилрикайни рахана. Гуьгъуьнлай ада вичиз тебрикиз ва выставкадиз килигиз атанвай вири юлдашриз сагърай лагьана.

Чпин нубатда художникдиз 70 йисан юбилей тебрикунин хуш келимаяр ва выставкадин яратмишунрикай чпин фикирар лагьайбурун арада М.Гьажиеван ученик Эльбрус Алиев, РД-дин лайихлу художник ва педагог Энвер Асалиев, райондин искусствойрин школадин директор Ширинбег Мусаев, Ахцегь РУО-дин начальник, филологиядин илимрин кандидат Халидин Эльдаров, художник-педагог Камил Шерифалиев, райондин дишегьлийрин советдин председатель, РД-дин культурадин лайихлу работник Таира Муспагьова, Огни шегьердин агроколлеждин Ахцегь филиалдин директор Земфира Муспагьова, и цIарарин автор ва маса ксар авай.

Дашдемир Шерифалиев