Дагъустандин халкьдин шаир СтIал Сулейманан хайи хуьряй тир Рамазан Дадашев “Лезги газетдихъ” галаз фадлай алакъаяр хуьзвай авторрикай сад я. Газетдин чинриз жуьреба-жуьре йисара адан къелемдикай хкатнавай сатирадинни юмордин цIудралди гъвечIи эсерар, гьикаяяр, кьисаяр, шиирар акъатна. Абур кIелзавайбуру хушдиз кьабулна.
Рамазан Дадашева вичин уьмуьр муаллимдин пешедихъ галаз алакъалу авуна, хайи хуьруьн мектебда чIаланни литературадин муаллим, завуч яз зегьмет чIугуна. Исятда пенсияда ава.
Ам “РФ-дин халкьдин образованидин отличник”, “Муаллим-методист”, “РД-дин лайихлу муаллим” тIварарин сагьиб я. 2006-йисуз тежрибалу муаллимди РФ-дин Президентдин грант къачуна. Ам “Зунни я, дуст, шииратдин “Меккедай” (2015-йис), “Чахъ амай сад…” (2016-йис) ва “Мехъерин шурва” (2022-йис) ктабрин автор я.
ЦIи Рамазан Гьажимегьамедовичан 75 йис тамам жезва. Чна къелемдин дустуниз и вакъиа рикIин сидкьидай мубаракзава, адахъ чандин сагъвал, яратмишунра мадни еке агалкьунар хьана кIанзава.
Культурадин ва литературадин отдел
