Аял вахтунда зун дидедихъ галаз Тагьирхуьруьн-Къазмайрал мехъерик фенай. Мехъерин кIвале авай рушари, гъиле бидон вугана, зунни чпихъ галаз яд гъиз къарасудал тухвана. Баку галай патахъай, сиристав ягъиз-ягъиз, йигиндаказ атай поездди зак садлагьана кичI кутуна. Ахпа зун а поезддал гьейран хьана, адан пенжеррай заз инсанар, аялар аквазвай. Гъилик квай бидон чилел эцигна, зи вилери ам геждалди рекье тунай. А чIавуз заз акI кIан хьанай хьи, зунни гуя а поездда аваз физвай… Мехъерин шадвилер заз ахкуначир, геждалди зи вилерикай къацу рангунин поезд карагиз хьанай.
Зи мурад кьилиз акъатна. Зун СССР-дин саки вири ракьун рекьерай фена, гьатта БАМ-дин рекьизни акъатна. Зи ихтилат гила БАМ-дин ракьун рекьин эцигунрин эхиримжи начальник, 10 йисуз ана кIвалахай ракьун рекьерин “генерал” Бабаев Салманакай я. Саратовда яшамиш жезвай аварви Мусади адакай заз хуш келимаяр лагьанай, а береда С.Бабаева Поволжский округдин ракьун рекьерин начальниквиле зегьмет чIугвазвай. Мусадиз ада Дагъустандин дуствилин еке кIвал эцигиз еке куьмекни ганай.
Бабаев Салман Мегьамедрасулович 1955-йисан 1-сентябрдиз Кьасумхуьруьн райондин Герейханован тIварунихъ галай совхоздал чIехи хизанда дидедиз хьана. Школа куьтягьайла, жегьил гада, яргъа авай Хабаровск шегьердиз фена, масадан куьмек галачиз, вичин кьилелди имтигьанар вахкана, ракьун рекьерин институтдин инженерар гьазурдай факультетдик экечIнай. 1978-йисуз вуз акьалтIарай адан зегьметдин сифте камар поезд гьазурдай начальникдин куьмекчи яз башламиш хьанай. Ахпа ада Комсомольскдин, гуьгъуьнлай Хабаровскдин сортировочный станцийрин начальник яз кIвалахна. Жегьил пешекар С.Бабаева БАМ-дин Ургал ракьун рекьин начальник язни зегьмет чIугуна. БАМ-дин са хел РагъэкъечIдай патан Сибирдин, муькуьдини Дальний Востокдин рекьериз чара авурла, С.Бабаев Дальний Востокдин ракьун рекьин начальникдин сад лагьай заместителвиле тайинарна. Дагъустандай, Кавказдай ахьтин дережадин къуллугърал алай маса са касни ина авачир. Хиве авай жавабдар везифаяр намуслудаказ кьилиз акъудиз, вичиз са патахъайни туьнбуьгь къачун тавур Салман Бабаев гьуьндуьр дережайриз хкаж хьун эвелни-эвел адалай вичелай, адан бажарагъдилай аслу тир. Заз ван хьайивал, БАМ-дал кIвалахдай чIавуз адан зегьметкешвилиз Гьейдар Алиевани еке къимет гана. 2000-йисуз Бабаев Салман Москвадин ракьун рекьин начальникдин заместителвиле тайинарна. Сибирдин къаярин-мекьерин вахтар кьулухъ галамукьна, анай ада меркездиз анжах вичин пешекарвилин тежриба, гьунарар хкана. Са береда ада Приволжский ракьун рекьиз регьбервал гана. Гуьгъуьнлай С.М.Бабаева кьуд йисуз “РЖД” ОАО-дин центральный аппаратда вице-президент, 2010-йисуз вице-президент — коммерциядин директор яз кIвалахна.
Адан гьакъисагъ зегьметдиз еке къиметни ганва. Бабаев Салман Мегьамедрасулович РФ-дин транспортдин лайихлу работник, “Знак Почета” ордендин сагьиб я. БАМ-дин тарихдин медални къачунвай СССР-дин ракьун рекьерин гьуьрметлу къуллугъчи Бабаев Салманан шабагьрин арада “Ракьун рекьерин транспортда гьакъисагъвилелди зегьмет чIугунай” медални ава.
Вири и дережайрив вичин гьакъисагъ зегьметдалди агакьнавай кас яз ам “РЖД” ОАО-дин коллек-тивдиз хъсандиз чида ва адаз ина еке гьуьрметни ава. Эхиримжи вахтара С.Бабаева “РЖД” ОАО-дин сад лагьай вице-президент яз кIвалахна.
Гила ада лайихлудаказ ял язава. Пенсиядиз рекье твадайла, “РЖД” ОАО-дин президент Олег Белозерова адан тIварцIихъ гзаф хуш келимаяр лагьанай ва адаз “РЖД” ОАО вилик тухунин карда лайихлувилерай” сад лагьай дережадин знак ганай. Идалай гъейри, цIийи технологиядин бинедаллаз пассажирар тухунихъ, парар дашмишунихъ галаз алакъалу электронный документар гьазурунин барадай ада теклифнавай къайдайрал арадал гъанвай “Парарин майдан” карханадал еке къимет эцигнай.
С.Бабаева ракьун рекьин транспортда саки 40 йисуз кIвалахна. Вични гьикI!
Къе адан рехъ кьегьал рухвайри давамарзава, абуруни, бубади хьиз, ракьун рекьерин институтар акьалтIарна, чпин пешедай кIвалахзава. Гьелбетда са бязи месэлайрай бубади абуруз пешекарвилин меслятарни къалурзава.
Салман Мегьамедрасуловичахъ кьуд велед, хтулар ава. Хайи мукавай яргъариз акъатнатIани, С.Бабаева вичин бубадин кIвал садрани рикIелай ракъурзавач. Гьар мумкинвал хьайила, багъри ватандиз хквезва. Ада вичин ватандашриз алакьдай куьмекарни гайиди я. Гьар са патахъай тамам дережайрив агакьнавай чи лезги стха, ракьун рекьерин “генерал” виридаз ала я. Вичин зегьметдалди, инсанпересвилелди ихьтин дережайрив агакьнавай ам зазни багьа я.
Пака Салман Бабаев дидедиз хайи югъ я. Заз, чи “Лезги газетдикай” менфят къачуна, адаз и лишанлу вакъиа рикIин сидкьидай мубаракиз кIанзава. Къуй адан рухвайрин ракьун рекьерани къацу эквер курай!
Бикеханум Алибегова
