Махачкалада кардик квай Елена Исинбаевадин тIварунихъ галай стадиондал мукьвара Вирироссиядин физкультурадин ва спортдин комплексдик кваз, «Оборонадиз ва зегьметдиз гьазур я» (ГТО-дин) нормативар ацIурунай Республикадин агьалийрин арада чемпионат кьиле фена. Ам Дагъустандин тIвар-ван авай гьукуматдин ва жемиятдин деятель, виликан Дагъустандин обкомдин партиядин сад лагьай секретарь хьайи Абдурагьман Даниялован 110 йис тамам хьуниз талукьарнавайди тир. Чемпионатдиз гуьгьуьллувилелди иштиракиз кIани 18 йисан яшдилай эгечIна 70 йисал къведалди ва мадни чIехи инсанар ачухзавай.
Чемпионатдин иштиракчийри комплексдик квай агъадихъ галай жуьредин нормативар ацIурна кIанзавай: жуьреба-жуьре яргъал мензилриз катун; турникдал кьадарралди чене агакьарун; къат жез чене чилик хкIурун; яргъай атана мензилдиз хкадарун; алай чкадилай яргъаз хкадарун ва масабур.
Чемпионатда Докъузпара райондин туризмдин, жегьилрин сиясатдин ва спортдин отделдин начальник Агъашериф Агъаширинова иштиракна. Вичин жегьил тушир яшдизни килиг тавуна, ада комплексдин кIуьд кIарцIин нормативар хъсан нетижаяр аваз ацIурна ва къизилдин лишан къазанмишна. Идалай гъейри, адан агалкьун пуд лагьай дережадин дипломдалди ва кишпирдин медалдалди къейдна.
ГТО-дин нормаяр вахкунин къайда чи республикадин школайра кардик кумаз хейлин йисар я. Гила адак чIехи несилдин векилрини хев кутазва. Ихьтин чемпионатри спортдал машгъул жезвайбурук артухан гьевес кутазва ва абурун жергеяр къалинарзава.
«Лезги газет»
