6-ноябрдиз Кьасумхуьрел машгьур писатель, юрист, мукьвара Лези писателрин Создин председателвиле тайинарнавай Абдурагьманан хва Абил Межидов СтIал Сулейманан районда кардик квай лезги писателрин Союздин отделенидин членрихъ галаз гуьруьшмиш хьана.

ТIугъвалдихъ галаз алакъалу яз тайинарнавай къадагъайриз килигна, гуьруьш гуьтIуь сер­гьятра аваз тухвана. Ана культурадин “Куьредин ярар” центрадин председатель, шаир Агьмедпаша Агьмедпашаева, лезги писателрин Союздин райондин отделенидин регьбер, шаир Абидин Камилова, маш­гьур шаирар тир Сажидин Саидгьасанова, Нажмудин Шихнабиева, и цIарарин авторди, райондин телевиденидин журналист Мизамудин Магьмудова, культурадин кIвалахрик къуьн кутазвай Мегьамед Мегьа­медханова ва масабуру иштиракна.

Мярекат хуш гьалара кьиле фена. Анал алай вахтунда чи милли литература, шиират авай гьалдикай, гележегда чун къадим­ халкь яз амукьунихъ авай важиблувиликай, дидед чIал, ли­тера­ту­ра хуьнихъ, ам раиж авунихъ авай метлеблувиликай гьарда вичин фикирар лагьана.

Вичин нубатдай Абил Межидова гуьруьш маналудаказ кьиле финилай разивал къалурна, милли писателрин Союз арадал гъайи Гьаким Къурбаназ,  рагьметлу Абдулбари Магьмудоваз, регьбервал гуз кIвалах давамарай чи къелемдин юлдашриз сагърай лагьана, гила виридан куьмекдалди Союздин кIвалах­да цIийивилер тун, виликди тухун герек тирдал фикир желбна, хейлин теклифар гана.

Эхирдай Сардар Абила кIватI хьанвайбуруз автографар алаз вичин цIийиз акъатнавай “Кьве дидедин хва” ктабдин 4-пай пишкешна, рикIел аламукьдай шикилар яна.

Къагьриман Ибрагьимов