Мукьвара Ахцегь райондин Хуьруьгрин хуьре просвещенидин “Люминари” центрада жегьил пианистрин районрин арадин ачух кьвед лагьай конкурс кьиле тухвана. Россиядин халкьдин артистка Рагьимат Гьажиевадин тIварунихъ галай и конкурсдин мурад-метлеб фортепиано ядай бажарагълу жегьилар малумарун ва абурун тереф хуьн, РД-дин Кьиблепатан территориальный округдин аялрин музыкадин ва искусстводин школайрин (ДМИ, ДШИ) арада яратмишунин алакъаяр мягькемарун тир.
Конкурсда Дербент ва Огни шегьеррай, Кьурагь, Рутул районрай, Ахцегь, Луткун, Мамедкъала, Геджух, Хазар хуьрерай атанвай 33 жегьил музыкантди иштиракна. Ам, тебрикдин сифте гаф рахуналди, мярекатдин тешкилатчи, Ахцегьрин музшколадин директор, РД-дин культурадин лайихлу работник А.Рагьимова ачухна. Жегьил музыкантрихъ элкъвена, тербиядинни тебрикдин келимаяр “Ахцегь район” МР-дин кьилин заместитель Вадим Агъасиева, мергьяматлувилин “Просвещение” фондунин президент, РД-дин лайихлу муаллим Магьмуд Абдулкеримова, РФ-дин искусствойрин лайихлу деятель, РД-дин халкьдин артист, Дагъустандин музыкантрин Союздин правленидин председатель, профессор Хан Баширова, Дербентдин музучилищедин директор Камила Магьмудовади ва масабуру лагьана.
Конкурсдин жюридин председатель Хан Баширова хуьре ихьтин метлеблу мярекат тешкилайбуруз, ана иштиракдайбуруз чухсагъул малумарна ва майдан жегьил пианистрин ихтиярда туна.
Конкурсдин нетижайрай 1-чкайриз Мегьамед Агьмедов, Муслим Шерифалиев, Къизилгуьл Шуаева, Саида Мегьамедова, Лейла Сулейманова (абур Ахцегьрин Р.Гьажиевадин тIварунихъ галай ДМШ-дин муаллим, РД-дин культурадин лайихлу работник Селимат Велиевади гьазурна), Саид Панаев, Зулейха Магьмудова (Дербент), Вилаят Рзаева (Хазар) лайихлу хьана. 2-чкаяр Мегьамед Эфендиева, Есения Яцуна (Ахцегь), Александра Пинхасовади, Айнурт Алиева, Марина Ибрагьимовади (Дербент), Марьям Саидовади (Мамедкъала) кьуна. ИкI, 1,2 ва 3-чкаяр кьур пианистриз талукь тир дережайрин дипломар гана. Конкурсдин вири иштиракчияр гьуьрметдин грамотайризни къиметлу пишкешриз лайихлу хьана.
Дашдемир Шерифалиев
