И йикъара Дагъустандин УФСИН-да (Управление Федеральной службы исполнения наказаний) УИС-дин (уголовно-исполнительный система) оперативный къуллугъчидин пешекарвилин йикъаз талукьарнавай мярекат кьиле фена. Ам ачухдайла, Управленидин начальник, къенепатан къуллугъдин генерал-майор Андрей Полякова пешекарвилин сувар тебрикна, ватандиз намуслудаказ къуллугъ авунай ва тахсиркаррихъ галаз женг чIугунай сагърай лагьана, ветеранрихъ яргъал йисарин уьмуьр хьун алхишна.
— Оперативный къуллугъчийри уголовно-исполнительный къурулушда кьетIен роль къугъвазва. Абуру четин шартIара зегьмет чIугвазва, дуьз рекьел хкидай идарайра законлувал ва къайдаяр хуьн таъминарзава. Им регьят кар туш. Анра кIвалахзавай гьар са кас чпиз намусдинни ахлакьдин виниз тир ерияр хасбур я. Чпиз ихтибар ийиз жедайбур, кар чидайбур, намуслувал квайбур, кьунвай рекьел, принципрал кIевибур, вири патарихъай тамам общество арадал гъуник чпин лайихлу пайни кутаз чалишмиш жезвайбур — ингье оперативный къуллугъчийриз хас ерияр, — къейдна А. Полякова.
Республикадин УИС-дин къурулушда зегьмет чIугвазвайбурун ва ветеранрин тIварунихъ тебрикдин келимаяр Дагъустандин УФСИН-дин начальникдин 1-заместитель, къенепатан къуллугъдин полковник Расим Мегьтиевани лагьана. Ада оперативный подразделенийрин къуллугъчийривай жуьрэтлувал, мягькем низам-къайда, датIана чпин пешекарвилин устадвал хкажун истемишзавайди алава хъувуна. И хиле зегьмет чIугвазвайбурун виниз тир пешекарвал къанун-къайда хуьдай жуьреба-жуьре ведомствойри ва гьукумдин органри гьам федеральный, гьамни региондин дережайра са шумудра къейд авурдини рикIел хкана.
Эхирдай А. Полякова къуллугъда тафаватлу хьайи ксарив чухсагъулдин чарар, грамотаяр ва рикIел аламукьдай пишкешар вахкана.
Рагнеда Рамалданова
