Муаллимвал виридалайни чарасуз, важиблу ва гзаф жавабдарвал авай пеше я. Халкьди лагьайвал, ам вири пешейрин шагь, бине я. И пешедилай лап зурба крар, кIвалахар, гьар са касдин гележегни аслу я. И кар чи дамахлу Шихнебиев Агьмед Мирзоевич муаллимдини тестикьарзава. Ам 1951-йисан 13-августдиз Кьасумхуьрел дидедиз хьана. Махачкъаладиз хизан куьч хьайидалай кьулухъ ада сифте классда меркездин 14-мектебда кIелиз башламишна. Гуьгъуьнлай хайи хуьруьз — Вини СтIалдал хтай Агьмеда муьжуьд классдин школа акьалтIарна.
1969-йисуз Махачкъалада В.И. Ленинан тIварунихъ галай ДГУ-дин филологиядин факультетдик экечIна. Анжах 2-курсуниз акъатнавай студент тирла, адан буба жегьилзамаз рагьметдиз фена, рикIел хкизва муаллимди: “Чи хизан чIехиди тир. Хендеда хьайи дидедихъ мад вад аял галай, чебни вири яшар бегьем тахьанвай, сад-садалай гъвечIибур тир. Чи хизан лап четин гьалда авай”. И кар себеб яз, Агьмед Шихнебиев чирвилер къачун заочнидаказ давамаруниз мажбур хьана.
1971-йисуз адаз армиядин жергейриз эверна. Хизандин гьалар лагьайтIа, мадни четин хьана. Хуьре гьеле кIвални эцигна куьтягьиз хьанвачир, я куьмекни, я такьатарни авачир. 1973-йисуз къуллугъна хтанвай жегьил Агьмед муаллимдиз, НуьцIуьгърин школада урус чIаланни литературадин тарсар гудай кIвалах буюрмишна. А вахтара, КIварчагъ дереда муаллимар кьит хьун себеб яз, чи Вини СтIалрин гзаф муаллимри гьана гьакъисагъвилелди, жемятдин патай еке гьуьрмет-аферин алаз зегьмет чIугурбурун тIварар чна дамахдивди кьазва: Экенрин хуьруьн мектебда директор хьайи Жамалдин муаллим, НуьцIуьгърин мектебда тарсар гайи Мегьамедали, Мирзяли, Салигь, Бакир. Гзафбур кечмиш хьанва, рагьмет хьурай чпиз. Агьмеда саки 21 йисуз гьа мектебда кIвалахна. 1994-йисуз ам вичин хайи хуьруьз хтана, Вини СтIалрин мектебда зегьмет чIугвазва. Гьикьван пашманвилер, четинвилер, уькIуь-цуру акунатIани, вири татугайвилериз дурум гана, гардан кIирнач, бубадин бармак агъуз вегьин тавуна, рикIе ашкъи, къаст туна хкягъай пешедиз вафалу хьана. Ам дерин чирвал, зигьин, алакьунар авай, зегьметдал рикI алай, пешедал кьару кас тирди адан кIвалахди, коллективди шагьидвалзава. Аялрин чирвилер мадни артухарун, гегьеншарун патал, зигьин мягькемарун яз, абурухъ галаз алава яз викторинаяр, кружокар, ачух тарсар тухузва. Алай девирдин истемишунриз артух фикир гана, кам-камуна аваз фидайвал, Агьмеда аялрин алакьунриз, кьатIунриз артух фикир гузва.
Вич кар алакьдай, алакьунар авай муаллим хьуниз килигна, Агьмедаз, урус чIаланни литературадин тарсарилай алава яз, РУО-ди НВП-дин ва ОБЖ-дин тарсарни тухун меслятна. Идалайни гъейри, “Просвещенидин отличник” рагьметлу Нурмегьамед Мегьамедова арадал гъайи машгьур музейдин директор ва ТОКС-дин руководителни хьайи ада мукьвал-мукьвал аялар галаз гьар жуьредин викторинаяр, кружокар, иллаки тербиядин, ватанпересвилин мярекатар тухузва. Икьван жавабдар везифаяр хиве гьатнавай Агьмед муаллим вичин вири уьмуьр и пешедиз бахш авунал рази я. Вичи тарс гузвай аялар ада вафалувилин, ватанпересвилин тербиядин истемишунралди руьгьламишзава. “Ватан кIан хьун, адан къадир хьун” ачух тарсара Агьмед Шихнебиева чIехи классдин аялриз музейда чи Ватандин ва хуьруьн ветеранрикай, абурун кьегьалвиликай менфятлу тарсар, райондин тарихдин метлеб авай чкайриз, музейриз къунши хуьрерин школайриз физ, ТОКС-дин гуьруьшар кьиле тухузва.
Агьмед Мирзоевич 45 йисан зегьметдин тежриба авай высший категориядин муаллим я. Адан зегьметдин бегьердиз РД-дин руководстводи еке къимет гана, цIудралди гьуьрметдин грамотайралди къейдна. Уьмуьрдин юлдаш Марият муаллимдихъ галаз санал Агьмед муаллимди пуд хцизни пуд хтулдиз тербия гузва. Къуй веледри абурун рикIер шадаррай!
Агьмед муаллим
Пашманвилер, четинвилер акуна,
Агьмед муаллим, вун алатнач рекьелай.
Гардан кIирнач, а пар валай алудна,
Вун пешедиз вафалу я рикIивай.
Вини СтIалрин мектебда на кIвалахиз,
Ишигълу тир илимдин экв кузава.
Жегьилрин насигьатчи, тербиячи,
Гележегдиз на ачух рехъ гузава.
Икрамда за муаллимрин зегьметдиз,
Куь зегьметар, шак алачиз, зурба я.
Аллагьди хуьй куьн, рикI алай муаллим,
Пуд хцинни пуд хтулдин буба я.
Замир Мегьамедов,
“Куьредин хабарар” газетдин мухбир
