Алатай йис, гьикьван муракабвилер, вилив техвей вакъиаярни агьвалатар арадал атанатIани, гьам республика, гьам санлай уьлкве патал хейлин рекьерай, гьалтзавай цацаризни къецепатарай вегьезвай къванериз килиг тавуна, писди яз алатнач. Магьрумвилерихъни телефвилерихъ игитвилер, агалкьунарни хьана. Якъин я хьи, гьатта какахьай, четин дуьшуьшрани хъсан гележегдихъ инанмишвилин терефдарар хьун важиблу я.
Россияди вич садавайни магълубиз тежедай чIехи уьлкве тирди успатна. Президент В.Путина тарихдиз хъфей йисан эхирда къейднай хьи, Россиядин макьсад ватандашар сад авун я, Москвади гьуьжет алай вири месэлаяр гьамиша ислягьвилин рекьелди гьялуниз майилвалзава. Ада рикIел хкана хьи, РФ-ди 2014-йисалай Украинадин гьалар ислягьвилин рекьелди гьялунин алахъунар авуна. Амма муькуь терефдин макьсадар маса жуьрединбур яз хьана.
Донбасс миллетбазрикай азад авунин мураддалди кьиле физвай махсус серенжемди агьалийриз вири хилерай, терефрай таъсирзава. Гзафбурун рикIел ватанпересвал хкана, гьа са вахтунда саки йисан девирда, сафунай ягъайбур хьиз, хаинарни керкичияр, жувпересарни жадуяр винел акъатна. Америкади, РагъакIидай пата вилик гъайи имтигьанрай чи уьлкве мидяйри вилив техвей саягъда экъечIна. СВО кьиле тухунив эгечIай сифте йикъара мидявалзавай уьлквейрин хейлин сиясатчийри, журналистри Москвадин туьквенрин дезгеяр ичIи жеда лугьудай чавар чукIуруналди хвешивилер авунай. Акуна хьи, гьич садни кашал акьалтнач. Санкцийри чпин кьилиз яд чимна. Идан гьакъиндай РагъакIидай патан хейлин уьлквейра газ ва маса затIар багьа хьуникди инсанрик акатай велвелайри, куьчейрани майданра гьатай гъулгъулайри шагьидвалзава.
Алатай йисан гатфариз Римдин Папа Франциска Украинада къалмакъал хьунин, ана СВО кьиле тухунин себебдикай куьруьдаказ ва маналудаказ лагьанай: “Россиядин ракIарихъ НАТО-ди амп авуникди Украинада чалпачух гьалар арадал атана”. “Къув ягъай кицI — гуьлледалди, гьараяй верч къирмедалди яда”, — лугьузвай халкьдин мисалда. Газдихъ, гьа жергедай яз “Северный поток” хъиткьинунихъ галаз алакъалу кьуьруькрани мидяяр магълуб хьана лугьуз жеда. Евросоюзди Россиядин газдин вини кьилин къимет тайинардай къарар акъудна. Гьар са рекьяй акIажарунин гьерекатар, серенжемар тешкилзава. РФ-дин Совбездин председателдин заместитель Д.Медведеван фикирдалди, газдин къиметдихъ галаз алакъалу ЕС-дин къарар кIамашвилинди я.
“РагъакIидай патан шел-хвалди, гьарайри къалурзава хьи, чи гьерекатри абурун геополитикадин къугъунарни планар кIватдайвал авуна. Итижрин барабарвал — ингье къецепатан сиясатдин жигьетдай чи девиз”, — лагьана РФ-дин МИД-дин кьил С. Лаврова.
* * *
…Алатай йис жуьрэтлу Пеленгдинди тир. Эхирдай заз кьетIендиз къейд ийиз кIанзава хьи, яратмишунрин, милли медениятдин хилерай алатай йисан нетижаяр, къалабулухар пара хьанатIани, лайихлубур хьана. Чи хейлин писателрин, шаиррин, алимрин цIийи ктабар чапдай акъатна, юбилейрихъ галаз алакъалу гурлу мярекатар тешкилна. Иллаки “Лезги-урус гафарган” акъатун зурба вакъиа хьана.
Аквазва хьи, сиясатдин гьаларилай тафаватлу тушиз, къелем гъиле авайбуруз садрани акъваздай, бушвалдай ихтиярар авач. Информациядин дяведин рекьиз душманвалзавай терефри серфзавай такьатрихъ, абуру чукIурзавай тапан малуматрихъ и кьил а кьил амач. ЯтIани, инсанар кьил акъудиз, тапарринни гьакъикъатдин арада фаркь тайинариз вердиш жезва.
“Лезги газетдин” редакциядин коллективди йисан къене газетдин чинал гьар са рекьяй кар алай, йикъан месэлайрай менфятлу малуматар, макъалаяр раижна. Алатай йисуз газетдин чинра чи ватандашрин кьегьалвилериз, ватанпересвилиз талукь эсерар гзаф хьун дуьшуьшдин кар туш. Инсандик ватанпересвал кутунин рекье эдебиятдихъ авай эгьмият къимет авачирди я. Насигьатчивилиз, ватанпересвилин тербия гуниз иллаки артух фикир гана кIанзава. Гьавиляй Президентди цIинин йис чи уьлкведа педагогдинни насигьатчидинди яз малумарнава.
Алукьнавайди ислягьвал кIани Къуьрен йис я. Дуьньяда ислягьвал, уьлкведихъ гъалибвал хьун гьар са ватандашдин эрзиман я. ГьакI хьуник чна умудни кутазва. Эвелни-эвел ахьтин умудар чаз Россиядин къудратлувили, халкьарин садвили гузва.
К.Къалажухви
