Чирвилерин, зигьиндин, кьатIунрин, акунрин жигьетдайни инсанар жуьреба-жуьребур жедайди хьиз, абурун кьисметарни гьар жуьрединбур жеда. Кьасумхуьруьнви жегьил гададиз са шумуд йисан вилик вичикай уьлкведин меркез тир Москва шегьерда ЧIехи Гъалибвилин 75 йисан Параддин иштиракчи жеда лагьанайтIа, мумкин тир ам чIалахъни тахьун.
Ихьтин кьисмет, мадни дуьз лугьун хьайитIа, ихьтин чIехи бахт гьар низ хьайитIани жезвач. Ихьтин чIехи ихтибардиз — 24-июндиз Москвада тухвай Гъалибвилин Парадда иштиракун кьисмет хьайиди РФ-дин оборонадин министерстводин Санкт-Петербургдин А.Ф.Можайскдин тIварунихъ галай Военно-космический академиядин курсант Имран Омарбегов я.
Инсанриз, чпин яшариз килигна, хас лишанар ава. Яшлу шаир СтIал Мислимата кхьизвайвал, инсан “Эгьил ятIа, афериндин, баркалладин винел хьуй. Жегьил ятIа, хуьруьн, кIвалин, даим, цуьк хьиз, гъилел хьуй”. Чаз мукьувай таниш туштIани, Имранан тIварни къе чи мецелла. ГьикI лагьайтIа, ада Москвада тухвай Парадда СтIал Сулейманан райондин патай векилвална. Аферин вичиз!
Имран 2000-йисуз Закир ва Жамиля Омарбеговрин гьуьрметлу хизанда дидедиз хьана. Кьасумхуьруьн 1-нумрадин юкьван школадани ада хъсан къиметар аваз кIелна. Ада вичин алакьунар са шумудра районда ва адалай къеце тухвай школьникрин олимпиадайра, конкурсра, КВН ва маса къугъунра, спортдин акъажунра къалурна. Имранан шикил “Абур школадин дамах я” стендда хьана.
Ахлакь-низам авай, ватанпересвилин тербия къачур жегьил, чна винидихъ лагьайвал, 2017-йисуз Санкт-Петербургдин А.Ф.Можайскдин тIварунихъ галай Военно-космический академиядик экечIна. Сифте курсунилай эгечIна Имрана хъсан къиметар аваз кIелзава, академиядин общественный уьмуьрда активвилелди иштиракзава, ада вичиз женгининни космосдин техника хъсандиз чирзава. Гьа са вахтунда, ам хъсан спортсменни я. ИкI, гиряяр хкажунай академияда тухвай акъажунра И. Омарбегова гъалибвал къачуна.
Имраназ Военно-космический академиядин руководстводин, преподавателрин ва курсантрин арада лайихлу гьуьрмет ва авторитетни ава. И гьакъикъатни чаз академиядин руководстводилай Кьасумхуьруьн 1-нумрадин юкьван школадиз ва курсантдин диде-бубадиз хтай чухсагъулдин чарарай чир жезва.
“Бахтавар я бубадин югъ, ферли велед хьайитIа”, — лагьанай СтIал Сулеймана. Закир ва Жамиля Омарбеговрин руш Эмилиядини Санкт-Петербург шегьердин государстводин пешекарвилин образованидин “Петровский колледж” учрежденида “Экономика и бухгалтерский учет” пешедай кIелзава.
Гьелбетда, 24-июндиз Москвада тухвай Гъалибвилин Парадда иштиракай Военно-космический академиядин курсантрин группадик Имран Омарбегов кутун — им адаз академиядин руководстводи авунвай еке ихтибар я. И кардал чна, райондин агьалийри, дамахзава. Са шакни алачиз, Парадда иштиракун Имаранан рикIелни яргъалди аламукьда.
Вахъ академияда кIелуна ва гьар са карда агалкьунар хьурай, Имран!
Хазран Кьасумов
