Алатай гьафтеда «Лезги газетдин» кьилин редактор Мегьамед Ибрагьимова хайи чIал хуьник ва вилик тухуник лайихлу пай кутунай бине Ахцегь райондай тир меценат Нариман Гъазалиевав «Лезги газетдин» — 100 йис» медаль вахкана.
Нариман Гъазалиев Дагъустанда лезги чIал хуьнин макьсадар аваз кьиле тухузвай мярекатрик вичин пай кутазвай жумарт ватанэгьлийрикай сад я. Кьилди къачуртIа, ада пулдин такьатар чара авуналди, са шумуд сеферда мектебра кIелзавай аялрин арада гьар жуьредин конкурсар, олимпиадаяр тешкилна, гъалибчийриз пулдин пишкешар гана.
Алай йисузни Н.Гъазалиеван куьмекдалди «Лезги газетдин» редакцияди Дагъустандин халкьдин шаир СтIал Сулейманан 155 йисан юбилейдиз талукьарнавай махсус конкурс кьиле тухуда. 2024-йис патал «Лезги газет» кхьиникни чи ватанэгьлиди вичин пай кутуна: Гъуьгъвезрин хуьре яшамиш жезвай 25 хизандиз газет кхьин патал редакциядиз 25 агъзур манат пул чара авуна.
Къейд ийин хьи, Н.Гъазалиева неинки образованидин, гьакIни Кьиблепатан Дагъустанда яшайишдин, спортдин, здравоохраненидин хилер вилик тухуникни вичин пай кутазва.
Чи мурад адахъ чандин сагъвал, яргъи уьмуьр хьун я. Къуй чи жумарт ватанэгьлийри гузвай садакьаяр Аллагьди кьабулрай.
Чи мухбир
