26-июндиз Ахцегь райондин кьил Осман Абдулкеримова райадминистрацияда нубатдин сеферда агьалияр кьабулунин серенжем кьиле тухвана. Идакай «Лезги газетдиз» райадминистрациядин пресс-къуллугъди хабар гузва.

Райондин хуьрерин са шумуд агьалиди чпин хсуси месэлайрин патахъай райондин кьиливай куьмек гун тIалабна. Ахцегьви Э. Абдулгьашумован кIвализ ва салаз 12-июндиз къвайи гужлу марфарин нетижада хейлин зиянар хьана. Ада райондин кьиливай администрациядин патай такьатрин жигьетдай алава куьмек гун тIалабна. О.Абдулкеримова ам месэладин гьакъиндай республикадин дережадин къарардихъ галаз танишарна, гъавурдик кутуна. Арадал атай гьалариз вичини кьетIен фикир гузвайдакай лагьана. Къейд авурвал, и месэла райондин ЧС-дин къуллугъдин регьбердал тапшурмишнава.

Хкем хуьряй атай Г.Мегьамедовади хуьруьн хъвадай цин турбайрин гьал хъсанзавачирдакай лагьана. Малум хьайивал, кIвалин патав гвай участокда хъвадай цин турба гилигнавай чка къайдадикай хкатуникди 24-июндин йифен вахтунда авахьай яд и агьали яшамиш жезвай кIвалин подвалдиз атана. Къейднавай месэла тади гьалда гьялун патал Ахцегь хуьруьн администрациядин кьил Н.Эфендиевал тапшурмишна.

С.Ризвановади вич Къурукаларин мектебда кIвалахал тайинарунин гьакъиндай райондин кьиливай куьмек тIалабна. Икьван чIавалди ада 16 йисуз Смугъулрин мектебда тарсар гана. Райондин кьили малумарайвал, и месэладиз анжах сентябрдин вацра килигиз хьун мумкин я, эгер тIвар кьунвай мектебда азад чка аватIа, месэла гьа чIавуз гьялиз жеда.

«Лезги газет»