Россиядин алимриз — илимдин докторриз государстводин патай  куьмек гунин мураддалди Россиядин Федерациядин Президентдин грантар къачуниз талукьарнавай 2020-йисан конкурсдин нетижайрикай малумарна. Вири жуьредин хилерай илимдин 57 доктордикай гъалибчияр хьана.

Илимни технологияр вилик тухунин лап кар алай “Переход к передовым цифровым, интеллектуалным производственным технологиям, роботизированным системам, новым материалам и способам конструиро­вания, создание систем обработки больших объемов данных, машинного обучения и ­искусственного интеллекта” хиляй 21 гъалибчи тайи­нарна. Абурун арада “Неэрми­товы вейлевские фермионы типов III и IV: исс­ле­дование природы спектров термо­динамики и транспорта” проект гваз май­дандиз экъечIай фи­зи­кадинни математикадин илимрин доктор  За­ур  Алисултановни  ава.

Машгьур конкурсда гъалибвал къачун чна Заур Алисултановаз рикIин сидкьидай тебрикзава.

*  *  *

И йикъара 2019-йисуз массовый информациядин такьатрин хиляй РФ-дин Гьукуматдин премиядин лауреатар чир  хьана. Талукь къарардал премьер-министр Дмитрий Медведева къул чIугуна. Лауреатрин сиягьда Да­гъустандин машгьур журналист  Алик  Абдулгьамидовни  ава.

Инстаграм сетда регионрин журналистика вилик тухудай “Каспий-Медиа” Центрадин официальный аккаунтди хабар гузвайвал, РФ-дин Гьукуматдин премия гудай, вичик уьлкведин медиасообществодин маш­гьур­ векилар акатзавай ведомствойрин уртах Советди Дагъустандин журналистди республикада коррупциядин, экологиядин ва карчивилин месэлайриз талукьарнавай материалриз еке къимет гана.

Алик Абдулгьамидов СМИ-рин хиляй Россиядин Гьукуматдин премия ганвай Да­гъустандин журналистрикай сад лагьай кас я. Виликдай, 2014-йисуз, виниз тир и шабагьдиз республикадин “Черновик” газетдин редакция лайихлу хьанай.

Аслу тушир журналистдин “Самурдин там хуьн. Вариантар мумкин яни?”, “Махачкъала — варваррин шегьер?”, “Кесиб инвестордикай са гаф лагь. Дагъустандин карчийрин уьмуьрдай пуд агьвалат (история)”, “Виртуальный дуьнья ва гьакъикъи дуьнья. Республикадин кьили Халкьдин Собранидиз рекье тунвай Чарчиз послесловие”, “КIулац арадал гъизва, начальникар!”, “Чилин кIаник квай гарнизондин гелерай. Аджимушкайдин запискаяр” макъалайри тIвар-ван авай экспертрин патай виниз тир баллар къазанмишна. Макъалаяр республикадин газетра ва регионрин журналистика вилик тухудай “Каспий-Медиа” Центрадин сайтда чапнавай.

РФ-дин Гьукуматдай телеграмма рекье туналди, Алик Абдулгьамидоваз къазанмишнавай шабагь шад гьалара вахкуниз талукьарнавай мярекатдиз Москвадиз эвернава.

Къейд. РФ-дин Гьукуматди массовый информациядин такьатар вилик тухун ва и хиле пешекарвилин кIвалах гьевесламишун патал и премия 2005-йисуз тешкилнай. Премиядин лауреатвилиз кандидатар общественный тешкилатри, массовый информациядин такьатрин хиляй организацийри, премиядин лауреатри ва СМИ-рин рекьяй гьукуматдин премияр гунин патахъай къарар акъуддай Советди къалурзава. РФ-дин Гьукуматдин премияр яратмишунрин ва пешекарвилин рекьяй виниз тир агалкьунар къазанмишай Россиядин, гьакIни урус чIалалди передачаяр тухузвай ва макъалаяр чапзавай къецепатан СМИ-риз гузва.

«Лезги газет»