Са шумуд югъ идалай вилик Челябинскдин областдин Магнитогорск шегьерда Россиядин Fight Nights Global (FNG) тешкилатди (какахьай единоборствойрай бягьсер тешкилунал машгъул тир) “Ракьун рикI” лишандик кваз турнир кьиле тухвана. Спортдин и мярекатдин программадик са шумуд бягьс квай.
Вичин ери-бине Докъузпара райондин Къаракуьредай тир Артур Алискерова ярумчух финалда еке заланвал (полутяжёлый) авайбурун арада чемпионвилин чIул къазанмишуниз мукьва жедай бягьс кьиле тухвана. Чи ватандашди нубатдин сеферда вичихъ еке устадвал авайди къалурна. ИкI, 3 раунддикай ибарат тир бягьс технический нокаутдалди акьалтIна. Артур Алискероваз вичихъ галаз бягьсиниз экъечIнавай Виталий Киселёвал гъалибвал къазанмишун патал анжах 24 секунд лазим хьана. Имни кваз гила чи ватандашди пешекарвилин спортда вири санлай 9 бягьс кьиле тухванва, абурукай 8-да ада гъалибвал къазанмишна. Ам гьакIни спортдин единоборствойрай (ММА ва грэпплинг) дуьньядин чемпиондин тIварарин сагьибни я.
РикIел хкин: са шумуд йис идалай вилик Магнитогорскда комбат-самооборонадай Артур Алискерова чемпионвилин чIул къазанмишнай. Гуьгъуьнлайни ам агалкьунралди хвенай (адахъ галаз бягьсиниз Магнитогорскдай тир Николай Радчек экъечIнавай). Гъалибвилер адахъ мадни ава.
Къейд. Артур Алискеров 1989-йисан ноябрдиз Самарада дидедиз хьана. Адан са йис тамам хьайила, хизан хайи ерийриз хтана. ЦIийи Къаракуьреда Артур 1-классдиз фена, ина ада спортдин рекье сифте камарни къачуна. Экстернидаказ 10-класс акьалтIарай жегьил Дербент шегьердиз куьч хьана. Ина ам мадни рикIивай спортдал, кьилди къачуртIа, единоборствойрал машгъул жез эгечIна. Алай вахтунда ада вичин устадвал Махачкъалада ва Каспийскда спортдин клубра хкажзава. Ада Суддин приставрин федеральный къуллугъдин РД-да авай Управленида кIвалахзава. Хизанда пуд аялдиз тербия гузва.
Рагнеда Рамалданова
