ЦIийи йисан вилик, республикадин саки вири министерствойра ва ведомствойра хьиз, Росгвардиядин Дагъустанда авай Управленидани территориальный органдин подразделенийрин кIвалахдин алатзавай йисан нетижаяр кьуниз талукьарнавай гегьенш совещание кьиле фена. Идакай чаз ведомстводин пресс-къуллугъди хабар гана.

Росгвардиядин Дагъустанда авай Уп­равленидин начальник, генерал-майор Александр Орехован регьбервилик кваз кьиле фейи и мярекатда Россиядин Федерациядин Кеферпатан Кавказдин округдин милли гвардиядин кьушунрин командующийдин яракьламишунин рекьяй заместитель, генерал-майор Игит Менафова, Дагъустандин гьукуматдин председателдин замести­тель Рамазан Жафарова, къанун-къайда хуьдай къурулушрин регьберри, махсус подразделенийрин командирри ва масабуру иштиракна.

Совещание башламишдалди вилик­ кIватI хьанвайбуру, къуллугъдин везифа­яр кьилиз акъуддайла, телеф хьанвай омоновчийриз Росгвардиядин Дагъус­тан Рес­публикада авай Управленидин ОМОН-дин «Горец»  базада хкажнавай мемориалдал цуьквер эцигна, са декьикьада кисна акъвазуналди, абурун экуь къаматар рикIел хкана.

Совещанидал Росгвардиядин Да­гъустанда авай Управленидин начальникдин заместитель — штабдин начальник Антон Зуева кьилин доклад авуна, территориальный  органди 2023-йисуз кьилиз акъуднавай кIвалахдин нетижаяр кьуна. Докладда къейднавайвал, алатзавай йисуз Управленидин къуллугъчийри 2500-далай виниз тапшуругъар  кьилиз акъудна. Штабдин начальник кьилди гьар са подразделениди террориствилин хиле тахсиркарвилерин вилик пад кьунин ва общественный къайдаяр хуьнин рекьерай кьилиз акъуднавай кIвалахдални акъвазна.

РФ-дин Кеферпатан Кавказдин ок­ругдин милли гвардиядин кьушунрин командованидин тIварцIелай Игит Менафова территориальный органдин къуллугъчийриз къазанмишиз алакьнавай агалкьунрай сагърай лагьана, алукьзавай ЦIийи йис тебрикна, виридахъ ва абурун багърийрихъ чандин сагъвал, хизанра хушбахтлувал хьун алхишна.

Рамазан Жафарова Росгвардиядин къул­лугъчийриз регионда общественный къайдаяр хуьнай, Украинада кьиле физвай дяведин махсус серенжемда уьлкведин итижар хуьнай  ва акьалтзавай несил ватанпересвилин руьгьдаллаз тербияламишуник лайихлу пай кутунай сагърай лагьана.

Санлай йисан нетижаяр кьун яз, Александр Орехова 2023-йис патал вилик эцигнавай везифаяр кьилиз акъудиз алакьайди къейдна. Идахъ галаз сад хьиз, уьлкведин Президентди, Рос­гвардиядин федеральный­ къуллугъди алукьзавай ЦIийи йисуз вилик эцигнавай месэлаярни вини дережада аваз кьилиз акъудунихъ инанмишвал къалурна. Региондин Управленидин регьберди абурни раижна. Къейд авурвал, 2024-йисуз, виликан йисара хьиз, терроризмдихъ ва экстремизмдихъ галаз женг чIугун, общественный къайдаяр, государстводин важиблу объек­тар хуьн, Управленидин къуллугъчийри Ук­раинада кьиле физвай махсус серенжемда иштиракун важиблу месэлайрик акатзава.

Эхирдай чпин везифаяр намуслудаказ кьилиз акъудзавай къуллугъчияр гьукуматдин ва ведомстводин шабагьар, чухсагъулдин чарар ва къиметлу пишкешар гуналди къейдна.

***

ЦIийи йисан вилик квай йикъара Рос­­гвардиядин Дагъустанда авай Управ­­ле­нида лишанлу са вакъиа мадни хьа­на. Территориальный органдин ВВО-да (вневедомственная охрана) кIвалах­­­завай 32 касдив къуллугъ кьиле­ тухун патал «Лада Гранта» маркадин машинрин куьлегар вахкана. Мярекатда Кеферпатан Кавказдин округдин милли гвардиядин кьушунрин командующийдин яракьламишунин рекьяй заместитель, генерал-майор  Игит Менафова­, Росгвардиядин Да­гъустан­да авай Уп­равленидин начальник ге­нерал-май­ор Александр Орехова, Да­гъустандин гьу­­куматдин председателдин заместитель Рамазан Жафарова, республикадин къанун-къайда хуьдай вири къурулушрин регьберри иштиракна.

— ЦIийи автомашинар агакьун  — им чи уьлкведин кьиле авай ксари ва Росгвардиядин командованиди чун алай аямдин яракьрин жуьрейралди ва дяведин махсус­ техникадалди таъминарунихъ элкъуьрнавай кIвалахдин нетижа я. Къе чи къуллугъчийрив агакьнавай автомашинрин конст­рукцийра 50 дегишвал тунва. Идани  вилик эцигнавай везифаяр ерилудаз кьилиз акъуддай мумкинвал гуда, — къейдна Игит Менафова, машинрин куьлегар вахкудайла.

Генерал-майор Александр Орехова, адан гафариз къуват гун яз, цIийи машинри Росгвардиядин къуллугъчийриз, республикадин мулкара общественный къайдаяр хуьнал гьалтайла, вилик эцигнавай везифаяр тади гьалда ва ерилудаказ кьилиз акъудун патал куьмекдайди алава хъувуна­.

Мярекатда кIватI хьанвайбурун гуьгьуьлар Росгвардиядин Махачкъалада авай военный частунин военный оркестрди мадни хкажна.

Къейд. Росгвардиядин Дагъустан­да авай Управленидин ВВО-дин  къул­лугъчий­рин 14 экипажди гьар юкъуз­ региондин мулкара хатасузвал таъминарунин кIвалах кьиле тухузва. 2023-йисуз «Тревога» сигналдай абур 2 агъзур­далай виниз сеферра куьмек лазим атай чкайриз тади гьалда­ фена. Административный ва уголовный законодательст­во чIурунай шак физвай 600-далай виниз агьалияр­ Дагъустандин МВД-дин къуллугъчийрив­ вахкана. Рос­гвардиядин Да­гъустанда авай Управленидин къуллугъчийри рес­публикада, санлай къачурла, 4 агъзурдалай­ виниз жуьреба-жуьре объектар, квартираяр ва транспортдин такьатар, чпин гуьзчивилик кутуналди, хуьзва.

Рагнеда Рамалданова