Чи ватанэгьлияр — гьар сана
Тула шегьерда авай чи ватанэгьлийри спортдин рекье къазанмишзавай бязи агалкьунрикай чаз фадлай хабар авай. Мукьвара заз мад са кар чир хьана хьи, и шегьерда алай вахтунда тайский боксдинни кикбоксингдин тренервиле кIвалахзавай Фарид Шагьбазовни чи ватанэгьли я. Адан гъилик чпихъ хъсан гележег авай лезги жаванарни спортдал машгъул жезва.
Фарид Арифшагьович Шагьбазов 1992-йисан 15-июлдиз Азербайжан республикадин Хачмаз райондин Угчуьн хуьре дидедиз хьана. 2009-йисуз ада хуьруьн мектеб куьтягьна. Спортдин ушу-саньда жуьредал ам 2004-йисалай машгъул жез эгечIна. Азербайжанда кьиле фейи хейлин акъажунрани агалкьунралди иштиракна. Ушу-саньдадай адакай пуд сеферда Азербайжандин чемпион, спортдин и жуьредай Еропадин ва Евразиядин, К-1 жуьредай Иранда кьиле фейи вири халкьарин чемпионатра призер хьана. Джиу-джитсудай Азербайжанда кьиле фейи республикадин чемпионатда, Гуржистанда тайский боксдай кьиле фейи вири халкьарин акъажунра ада чемпионвилин тIвар къазанмишна.
2014-йисуз Фарид кьисметди Тула шегьердиз акъудна ва ина ада тайский боксдайни кикбоксингдай спортдал машгъул хьун давамарна. Туладин, Калугадин, Орелдин, Воронеждин ва Москвадин областра кьиле фейи спортдин акъажунра вичин алакьунарни устадвал къалурна. Пешекарвилин женгера кьиле тухвай 9 бягьсиникай 8 гъалибвал къачуналди акьалтIарна. Тайский боксдай ва К-1 жуьредай кьиле фейи ЦФО-дин акъажунрани адахъ агалкьунар хьана.
Тренервилин кIвалахдив ам 2020-йисуз эгечIна. И гъвечIи муддатда ада текба-тек женгерин сирер чирнавай жегьилрихъ хьанвай агалкьунри насигьатчидин вини дережадин устадвал успатзава. Ада тайский боксдални кикбоксингдал рикI алай аяларни, чIехибурни вердишарзава. Фарида ихтилат авурвал, алай вахтунда Тулада адан гъилик вердишвилер къачузвайбурун арада вад лезги ава. Муаллимди-тренерди абурук еке умудар кутазва.
Ингье абурун агалкьунар: Агьмед Сейфедовакай (15 йис) тайский боксдай Москвадин областдин чемпион хьана, и жуьредай Туладин областда приздин чка кьуна. Али Сейфедов (13 йис) Туладин, Москвадин, Калугадин областра, Артем Гуьлнезеров (14 йис) Туладинни Москвадин областра тайский боксдай кьиле фейи акъажунрин призерар я. Алихан Атлиханов (13 йис) тайский боксдай Туладин областда кьве сеферда чемпион, Воронеждин областдин чемпион, Калугадин областдин призер я. Адан гъвечIи стха Умар Атлихановакай (9 йис) тайский боксдай Туладин областдин чемпион хьана.
Вичин регьбервилик кваз спортдин сирер чирзавай, акъажунра агалкьунарни къазанмишзавай жегьил пагьливанрал муаллимди-тренерди дамахзава. Къуй чи ватанэгьлийрихъ спортдин алемда зурба агалкьунар хьурай!
К.Ферзалиев
