Жегьилар чи гележег я. Абурун сагъламвал хуьнин, наркотикар ва ички ишлемиш тавунин, чIуру рекье гьат тавунин мураддалди яш тамам тахьанвай аялринни жаванрин арада инсандин бейнидиз таъсирдай шейэр ишлемиш тавун патал гьамиша гъавурда твадай кIва­лах тухун — им тербия гунин рекье лап ва­жиб­лу хел яз гьисабзава Дербентдин педколледждин тербиячийри.

И йикъара педколледждин актовый залда, наркотикри инсандин чандиз гузвай зияндиз талукьарна, сад лагьай курсуна кIелзавай студентринни  пешекаррин гуьруьш кьиле фена.

Ана наркотикар чукIун тавун патал гуьзчивал тухузвай Дагъустанда авай МВД-дин управленидин оперуполномоченный, полициядин лейтенант Тимур Алиева, Дербентдин районрин ур­тах диспансердин духтур-нарколог Абдулла Исрафилова, педколледждин медработник Сурая Рамазановади ва масабуру иштиракна.

Сурая Рамазановади вичин рахунра къейд авурвал, эхиримжи цIуд йисуз Россияда яш та­мам тахьанвайбуру ва жегьилри синтетика квай шейэр (ПАВ-психоактивные вещества) ишле­мишун лап чIехи месэладиз элкъвенва. Ида сагъламвилиз, уьлкведин экономикадиз, яша­йишдин хилез ва гьакIни къайда хуьниз ­бегьем хата гузва. Уьлкведин гьар вад лагьай агьа­ли и тIегъуьндин таъсирдик ква. ­Эхиримжи цIуд йисуз наркотикар ишлемишзавай яш тамам тахьанвайбурун арада рекьизвайбурун ­кьадарни 42 сеферда гзаф хьанва, ибурукай­ гзаф  пай  —  (62 %)  доза  гзаф  хьана  рекьизвайбур я.

Тимур Алиева вичин рахунра наркотикар ишлемишзавайбурун эхир гьихьтинди ятIа, къанундал амал тавуна, психотропный, наркотикар квай шейэр маса гуз ва чукIурзавайбурув, гьакI наркотикар ишлемишзавайбурув жаза агакьзавайди, мисаларни гъана. Студентриз “Дурман для неудачников” видеофильм къалурна.

Абдулла Исрафилова, вичин нубатда, медицинадин ва психологиядин жигьетдай жегьилрин бедендиз, сагъламвилиз  наркотикри таъсирзавайвал ихтилатна.

Эхирдай пешекарри студентрин са жерге суалриз жавабар гана.

Чи  мухбир