И йикъара Сулейман-Стальский райондин кьил Нариман Абдулмуталибова ва меценат Мамед Абасова «100 мектеб» проектдин сергьятра аваз ремонт авур Агъа СтIалрин мектебдин дарамат ахтармишна.
624 ученикдиз чка авай Агъа СтIалрин типовой мектеб 1989-йисуз эцигна. Дарамат тамамвилелди ремонт авунин гьалдиз атанвай. РД-дин кьил В.Васильеван «100 мектеб» проектдиз такьатар чара авунин сергьятра аваз, Агъа СтIалдилай тир М.Абасова хайи хуьруьн мектеб ремонт авун патал вичин патайни 2 миллион манат чара авуна. И такьатрихъ мектебдин дараматда хейлин цIийивилер туна. Алай вахтунда пландик кутур ремонтдин кIвалахар кьилиз акъудна куьтягьнава.
Ремонтдин кIвалахрин нетижайриз фикир гайила, алава яз, ракIар, дакIарар дегиш хъувунин бязи кIвалахар винел акъатна. И месэлаярни Мамед Абасова вичин хивез къачуна ва кIвалахар гьафтедин эхирдалди тамамардайвал я.
Райондин кьил Нариман Абдулмуталибова мектебдиз куьмек гунай Мамед Абасоваз чухсагъул малумарна.
«Лезги газет»
