Ван авуна
Малум тирвал, ахтармишун патал чи республикада (бязи шегьеррани районра) “Михьи шегьер” ва “Михьи район” проектар кардик кутунва. Зи фикирдалди, лап вижевай серенжем я. Белки, лугьуда за, и цIийи проектри чи шегьерра, хуьрера экология, тIебиат, чун элкъуьрна кьунвай ерияр чиркинар тавуниз, гьар сана ихтиярсуздаказ арадал къвезвай хъуртар тIимил хьуниз таъсирда.
Винидихъ тIварар кьунвай проектар кардик кутунвай чкайра абур гьи къайдада кьилиз акъудзаватIа, сифтегьан нетижаяр гьихьтинбур ятIа, заз чи багъри “Лезги газетдин” алай йисан 34-нумрада чапнавай са макъала кIелайла чир хьана.
Къелем гъиле кьунин мана-метлеб ам я хьи, ихтилат физвай проект зун яшамиш жезвай Дербент шегьердани кардик кваз са кьадар вахт алатнава. Лагьана кIанда, и цIийивал уьмуьрдиз кечирмишунин нетижада къадим шегьерда михьивал хуьнин барадай хъсанвилихъ дегишвилер кьиле фенва. Шегьердин администрациядин ва «ЭКО-ЮГ» карханадин алахъунар себеб яз, зирзибил кIватIдай куьгьне контейнерар цIийибуралди эвезнава, яшайишдин кIеви амукьаяр (ТБО) дашмишдай махсус улакьрин кьадарни артух хьанва, виликдай хьиз, зирзибил гьафтейралди контейнерар алай майданрал аламукьзавач, вахт-вахтунда шегьердай акъудзава.
Амма “Михьи шегьер” проект кардик кватIани, Дербентда хейлин агьалийри гьахълудаказ наразивалзавай месэлаярни авачиз туш. ГьикI хьи, контейнеррин майданар виринра ваъ, анжах шегьердин кьакьан мертебайрин кIвалер авай куьчейра эцигнава. ЦIийиз арадал атанвай хсуси кIвалер авай районра абур садни авач. И барадай гзафбурукай анжах са мисал гъида.
Зун яшамиш жезвай “Аваин-4” микрорайондиз зирзибил дашмишдай машинар ерли къвезвач, куьчеяр шиткизвач. Са кар ава: и ва маса микрорайонра фадлай инихъ, къванер атIана, ишлемиш хъийин тийизвай са шумуд дерин карьер хьуниз килигна, маса чара тахьайла, агьалийри зирзибил тухуз гьанриз гадарзава. Пешер, векьер лагьайтIа, кьуру хьайила, чпин салара цIай яна кузва. Къейдна кIанда, ихтилат физвай карьерриз шегьердин маса чкайрани эцигунардай материалрин амукьаяр гъиз гадарзава.
Фадлай инихъ авай чIуру гьал арадай акъудун патал агьалийри са шумуд сеферда чкадин гьукумдин кьилевайбуруз шикаятна, амма дегишвал хьанач.
Къарагъарнавай месэладин жигьетдай мад са мисал. Шегьердивай са кьадар яргъа авай микрорайонра яшамиш жезвай агьалийрал, чпиз хабарни авачиз (квитанцияр агакьар тийиз), “ЭКО-ЮГ” ООО-ди дашмиш тийизвай зирзибилрай буржар илитIзава. ТIвар кьунвай карханадин ва шегьердин ЖКХ-дин управленидин векилар яргъал микрорайонриз ерли къвезвач, зирзибил дашмишунин барадай агьалийрихъ галаз икьрарар кутIуннавач.
Нариман Къарибов
