ЧIалан устад, адан халис иеси хьайи Гьажибег Гьажибегова вичин вахтунда чIалаз талукь яз икI кхьенай: “Лезгидин вирида­лайни гужлу ва хци яракь адан чIал я”. И гафарин мана-метлеб къенин юкъузни тазазма. И келимаяр чи гьар садан фикирда гьамиша хвейитIа, хъсан кар жеда.

Лезги чIал, адан михьивал хуьниз талукьарнавай мярекатар  чи мектебра, аялрин бахчайра, ктабханайра тIимил тухузвач. И къайгъуйрик жезвайбурни асул гьисабдай чIаланни литературадин муаллимар я.

Ихьтин кIвалах эхиримжи вахтара СтIал Сулейманан рай­он­да­ кьиле тухвай хуралай кIел­­дай­­бурун телеконкурсдини раижна.

Османова Сегьерхалум лезги чIаланни литературадин муаллим я. Адахъ и рекье кIвала­хунин 44 йисан тежриба хьанва. Ада Герейханован хуьруьн сад лагьай отделенидин юкьван мектебда кIвалахзава. С.Османовадин кIвалахдин тежриба райондин мектебрин муаллимрини чирзава. Нетижада аялри ватанпересвилин, дуствилин, тIебиат хуьнин, муьгьуьббатдинни кIанивилин темайрай кхьенвай шиирар са ванцелди ваъ, гьарма са жуьре се­синалди, гъилерин, чинрин юзунралди лу­гьуз­ва. Ида артист­вилин, сегьнедин устадвилин ала­кьунар артухарзава, аялрин ашкъи — гьевес хкажзава.

Гьелбетда, аялар чеб и кар­да­л ашукь ва рази хьун хъсан кар­ жезва. Чна тIвар кьур Се­гьер­ха­лум Рашидовна кIва­лахда цIийи къайдаяр ишлемишунал, абур жагъурунал, раиж авунал машгъул муаллим, зегьметдин ветеран я. “Лезги газет” кхьизвай ва кIелзавай, аниз ва журналризни макъалаяр кхьизвай авторни я. Адаз женгининни ватанпересвилин темаяр, чIал вилик тухунин серенжемар гзаф кIан­да.

Совещанийрал, конференцийрал, жюридин заседанийрал ам вичин тежрибадикай, кIвалах хъсанардай рекьерикай рахада. Мукьвара райондин администрациядин патав гвай зегьметдинни дявейрин ветеранрин советдин ну­батдин правленидал чIалан ва ва­танпересвилин месэлайрай кIва­лах хъсандиз тухунай Се­гьер­халум Рашидовнадиз вете­ран­рин со­ветдин Гьуьрметдин грамота га­на.

Вичин нубатда ада гележегдани хъсандиз зегьмет чIугва-дайдахъ инанмишарна…

Райсудин Набиев