24-апрелдиз Дербент шегьерда авай государстводин, сиясатдин ва жемиятдин зурба деятель Нажмудин Самурскийдин тlварцIихъ галай паркуна субботник кьиле фена. Ана патав гвай кlвалера яшамиш жезвай агьалийри, общественный тешкилатрин векилри, Нажмудин Самурскийдихъ майилвалзавай активистри иштиракна.
Субботникдин иштиракчийри паркуна авай зирзибил кlватlна, тарарин пунариз пер яна. Ахпа абуру Н.Самурскийдиз памятник эцигдай чка михьна, фур эгъуьнна, анал гележегда памятник эцигдай чlехи къван чиле туна, ам мягькемарна.
И мярекат акьалтlарайла, анал митинг кьиле фена. Кlватl хьанвай юлдашри, Н.Самурскийдиз памятник эцигунин мураддалди тешкиллувилин комитет арадал гъана ва адан кьил яз Агъамедов Садыкь хкяна.
Садыкь Агъамедов: “Къе и мярекатдиз атана и кlвалахрик кьил кутунвай куьн сагърай. Идахъ чlехи метлеб ава. Шегьерда Нажмудин Самурскийдиз памятник эцигунин кlвалахдик сифте кьил кутурди гьуьрметлу духтур, общественный деятель, рагьметлу Нариман Салманович Рамазанов ва маса кьегьал рухваяр тир. Гьайиф, ам, вичин мурадрихъ агакь тавуна, чавай къакъатна.
Къе чна, сад хьана, инал адаз бюст эцигдай чкадал диб тир чlехи къван гьикl эцигнатlа, къведай йисуз, Аллагьди гайитlа, чи гьар садан куьмекдалди адал памятник хкажда”.
Шихмурад Шихамиров: “Къе чна важиблу кlвалахдик кьил кутунва. Н.Самурскийдин патахъай гагь инай, гагь масанай, ада акl авунач ва я икl авуна кlандай тир лугьуз, гьар жуьредин ялтахри чпин ванер хкажзава.
Советрин власть арадиз къвезвай а четин вахтунда ада вичел тапшурмишнавай вири везифаяр жавабдарвилелди, намуслудаказ, къайдайрал амал авуна, кьилиз акъудна. Гьакl тахьанайтlа, мумкин тир чаз къе Дагъустанни тахьун…”
Гуьлпери Мирзебалаева: “Дагъдиз хкаж жедайла, чна мус кукlвал акьалтда лугьуз фикирда. Къе чун а дагъдин кукlвал акьалтиз са кам ама лагьайтlа жеда. Чи аялри, хтулри, птулри Нажмудин Самурский вуж тир лагьана суал гайила, жаваб яз, чавай абур гъил кьуна, и паркуниз гъана, чи кьегьал хцикай суьгьбетиз, абуруз тарихдин тарс гуз жеда.
Бязибуру Н.Самурскийдин биографияда гуя “рехи лекеяр” ава лугьузва. Абур гьа девирдин “лекеяр” я. Ам гьа аямдин гьуьрметлу, лайихлу ва такабур инсан тир”.
Дербентдин интеллигенция са шумудра кlватl жез, кьиле тухуз тахьай и кар къе кьилиз акъатайла, чун гзаф шад я. Аллагьди къуват гурай куь крариз.
Къагьриман Ибрагьимов
