Алатай гьафтеда Красноярскда азаддаказ кьуршахар кьунай “Иван Ярыгинан Кубок” международный турнирди — йисан эвел кьилера кьиле тухузвай спортдин мярекатди — спортсменар патал йисан “старт” гана. И турнир кьиле тухузвай яргъал йисарин нетижайри шагьидвалзавайвал,  ана къалурай устадвилелай чIехи пай вахтара йисан амай акъажунрин кьадар-кьисмет аслу жезва. Кьилди къачур­тIа, и турнирда гъалибвал къачур “азадбурукай” дуьньядин кесерлу майданра иштиракдай команда арадал гъизва.  Ахьтин мумкинвални и сеферда чи ватанэгьлийрикай и акъажунра иштиракай  Шамил Мамедова  къазанмишнава. Ам 65 кг-дал къведалди заланвал авайбурун арада къизилдин медалдиз лайихлу хьана.

Къейд авун лазим я хьи, Шамил Маме­дова иштиракзавай заланвилин категория виридалайни гзаф конкурентар авайди я. Гьаниз килигна, бягьсерни къизгъиндаказ кьиле фин сир туш. Чи машгьур спортсменрикай мадни сада — Рамазан Фер­за­лиевани и турнирда иштиракна. Финалдин кьудакай сад лагьай паюна чи кьве ватандаш — Шамил Мамедов ва Рамазан Ферзалиев — чеб чпихъ галаз бягьсиниз экъе­чIун (гила кьвед лагьай сеферда) кьисмет хьана. Нетижада, алатай сеферда хьиз, гилани Ш.Мамедов гъалиб хьана. И турнирда адан кьисметдиз атанвай им сад лагьай “имтигьан” тушир. ГьикI хьи, ярумчух финалда Шамил вичихъ галаз санал устадвал хкажзавай (алай вахтунда Россиядин чемпион тир) Ибрагьим Ибрагьимовахъ галаз бягьсиниз экъечIна, нетижада 4:3 гьисабдалди гъалибвал къазанмишна. Инал чи ватанэгьлиди и турнирда Ибрагьим Абдурагьмановахъ галаз кьиле тухвай бягьс вахт амаз, 13:2 гьисабдалди акьалтIа­рай­дини рикIел хкиз кIанзава. Финалда Гь.Рашидовахъ галаз кьиле фейи  бягьсина Шамила активвал, жуьрэтлувал ва къастунал­ кIевивал къалуруни хъсан нетижадал та­гъа­на тунач, ада инанмишвилелди гъалибвал къазанмишна.

Чи мурад ам Европадин ва дуьньядин чемпионатрайни гъалибвал гваз хтун я.

Рагнеда Рамалданова