Чи ватанэгьлияр — гьар сана
Кьунвай пешеда, кеспида магьирвилелди, бажарагълувилелди алакьунар къалурзавай, а алакьунри агалкьунрин гурарай вини дережайризни хкажзавай ватанэгьлияр-устадар чахъ тIимил авач. ТIебии кар я, вирибурукай чаз са артух хабарни жезвач, амма эхиримжи вахтара интернетдин жуьреба-жуьре чешмейра чал чпин тIварар дамахдивди кьаз жедай ксарикай хъсан малуматар гьалтзава.
Вичикай ихтилат фидай Камилла Мурадовна Эюбовани алакьунар авай жегьил, еке пешекарвилелди скрипка ядай машгьур музыкант, манидар, оркестрдин артистка, скрипка ягъиз чирунин рекьяй муаллим я. 2000-йисуз ада пешедин рекьяй Грециядин меркезда кьиле фейи международный конкурсда гъалибвал къачуна. Им вини дережадин агалкьунрикай я.
Камилла Эюбова 1988-йисуз Махачкъалада яратмишзавайбурун хизанда дидедиз хьана. Адан диде Эмма Эюбова пешекар скрипачка я, буба Мурад Акаев — художник. Вад йисан яшда авайла, Камиллади Калининграддин Р.М. Глиэран тIварцIихъ галай аялрин музыкадин мектебдиз камар къачуна.
1996-2006-йисара ада тежрибалу муаллим Татьяна Колчановадин регьбервилик кваз Москва шегьердин музыкадин центральный мектебда чирвилерни вердишвилер къачуна. Бажарагъ авай жегьилди и йисара мектебрин хейлин концертра, гьа жергедай яз Рагьманинован тIварцIихъ галай Москвадин консерваториядин концертрин залдин, Россиядин гьукуматдин академический чIехи театрдин Бетховенан залдин сегьнейра вичин алакьунар къалурна.
2011-йисуз П.И.Чайковскийдин тIварцIихъ галай Москвадин консерватория агалкьунралди куьтягьна. Ина кIелай йисарани ада шегьердин машгьур сегьнейра, концертрин залра иштиракна. Лезги музыкантдин яратмишунрал рикI алайбур, адан алакьунриз хъсан къимет гузвайбур маса уьлквейрани гзаф ава. 2012-йисалай эгечIна, К.Эюбовади дуьньядин хейлин уьлквейра (Латвия, Франция, Испания, Греция, Австрия) концертар гузва. 2013-2014-йисара ада Москвада “Аурео Ювентус” оркестрдин концертмейстервиле, 2014-2017-йисара Москвада кардик квай цIийи операдин театрда скрипачкавиле кIвалахна.
Бажарагълу устадди скрипкадал язавай макьамрин жуьреба-жуьревал гегьеншди я: ада 17 асирдин макьамрални чан хкизва, чи йикъаринбурни тамамарзава.
2019-йисуз, машгьур кьве композитордин — И.Брамсан ва С.Франкан — яратмишунриз бахшна, К.Эюбовади фортепиано язавай устад А.Паклинадихъ галаз Москвада “Муьгьуьббатдин тарих” лишандик кваз кьиле тухвай концерт яб акалайбуру лап хушдиз кьабулна.
Къуй чи ватанэгьлидихъ музыкадин рекье мадни зурба агалкьунар хьурай!
«Лезги газет»
