Ислендин нянрихъ “kremlin.ru” сайтда раижай хабарди цIайлапанди хьиз ван авуна: РД-дин Кьилин везифаяр вахтуналди тамамарун икьван чIавалди Ставрополдин крайдин патай РФ-дин Федерациядин Советдин векил хьайи Сергей Меликовал ихтибарна. Республикадин регьбервиле цIийи кас тайинарунин барадай ванер-сесер идалай вилик электронный СМИ-дин такьатра чкIанвай. Лугьудайвал, Дагъустанда виликамаз чкIизвай ванер-сесер гзаф дуьшуьшра гьакъикъатдиз элкъвезва.
Дагъустандин “къуншияр” Къарабахда къалмакъалрин яцIа гьатнавай макъамда “патанди” тушир викIегь генералдин хиве чIехи жавабдарвал тунихъ чинебан сир тахьана жеч. Республикада коронавирусдихъ галаз женг чIугунин гьерекатарни жавабдарвилелди давамар хъувуна кIанзава.
Малум тирвал, Дагълух Къарабахда арадал атанвай лап къизгъин гьалар явашарун патал къал-къиж тунвай кьве терефдизни Россиядин, гьакI хейлин маса уьлквейрин гьукумдаррини эвер гузва.
Азербайжандин терефди жегьилар къурбандриз элкъвена кIанзавач лугьузватIани, Эрменистандин терефди хьиз, ислягьвал арадал хкунин рахунрик кьил кутазвач. Гьарда вичин шартI малумарзава. Гьар терефдиз вичин итижриз зарар тагудай “рахунар” герекзава.
Ихтияррал гьалтайла, Азербайжандин гьукумди ватандашрин арада барабарсузвилер тунвайдини фадлай ашкара делил я. Къе а патан лезгияр “чара атIай кьуьл” авуниз мажбур хьанва…
В.Путина къуватдин къурулушра кIвалахдин тежриба авай ксар Дагъустандин кьиле тайинарунихъ еке метлеб ава. Сифтегьан тежрибани менфятлуди хьана. Кьилди къачуртIа, В.Васильеван кIвалахдин нетижайрикай ада разивилелди къейдна: “Республика вилик тухун патал куьне гзаф крар авуна, иллаки и четин береда. КичIе тахьана, гзаф крар жуван хивез къачуна ва лап лайихлудаказ буржи тамамарна”.
Гуя хъсанвилихъ са дегишвални гьиссиз жезвач лугьуз, Владимир Васильевалай наразивалдайбурни тахьана амукьнач. Амма, виликанбурув гекъигайла, адан тIвар пис къелемдик акатнач. Са четинвални авачиз тапан информация чукIуриз жезвай къенин чалпачух девирда кискис гудайбурун таъсирдик акат тавунни кьетIен лайихлувал я. Инал, Сулейман-Стальский районда В.Васильеван куьмекдалди са чIехи проект кьилиз акъуддайла, интернетдин майданра бязи миллетбазри авур «шел-хвал» рикIел хквезва.
Дагълух чкайра къе ахварайни такур крар кьилиз акъатунилай дагъвийри пара разивалзава. Икьван чIавалди Кьиблепатан зона “рикIелай фенвай” чкадиз элкъвенвай эхир. Гьахълувал гвай касдиз халкьди гьамиша алхишда.
ЦIийи регьбердин вилик экс-регьберди кьил кутур крар генани йигин еришралди вилик тухунин асантсуз кIвалахар акъвазнава. Миллетрилай аслу тушиз, санлай республикадин халкьдин патай гьуьрмет, ихтибар къазанмишиз алакьайтIа (и кардал шак гъизвач), Сергей Меликова вичин къуллугъ “вахтуналди яз” ваъ, яргъалди кьилиз акъудуни Дагъустандив цуьк акъудиз тада. ТIуьрдалай незмайди хъсан я лугьудайвал, гила чна эхиримжи пуд-кьуд йисуз хьайи крарилай инлай кьулухъ хъжедай крар мадни хъсанбур хьуник умуд кутазва. Иншаллагь!
К.Ферзалиев