Алатай йисан декабрдиз чи машгьур ватандаш, Россиядин ва дуьньядин спортдин майданрани тIвар-ван авай Гьабиб Аллагьвердиев боксдай Дагъустандин федерациядин регьбервиле тайинарна. Малум тирвал, адалай вилик и къуллугъдал чи маса ватандаш — вични машгьур боксёр Альберт Селимов алайди тир.
РикIел хкин: 2003-йисуз Гьабиб Аллагьвердиева военный рекьяй къуллугъчийрин арада кьиле тухвай Виридуьньядин къугъунра гъалибвал къазанмишнай. 2004-йисуз ам Россиядин чемпионвилин тIварцIиз, 2005-йисуз олимпийский боксдай дуьньядин чемпионатдин буьруьнждин медалдиз лайихлу хьана. 2012-2014-йисара ада IBO ва WBA версийрай пешекаррин арада дуьньядин чемпионвилин тIварар къазанмишнай.
Чна Гь.Аллагьвердиеваз цIийи къуллугъ ва алукьнавай ЦIийи йис рикIин сидкьидай тебрикзава. Адан регьбервилик кваз Дагъларин уьлкведин боксёрар генани кьакьан дережайриз хкаж хьун алхишзава.
«Лезги газет»
