И йикъара “Мавел” чапханада “Гьаким Къурбанан романар мектебда” ктаб-пособие акъатна. Автор Сегьерхалум Османовади зари Гьаким Къурбанан романар милли мектебда чирунин тежрибадикай суьгьбетзава.
Хайи чIалан ва литературадин тарсар гузвай муаллимар патал им лап хъсан ктаб-меслятчи хьанва.
Сулейман-Стальский райондин Герейханован хуьруьн 1-нумрадин юкьван школада кIвалахзавай муаллим-методист Сегьерхалум Рашидовна Османовадин къелемдикай муаллимар патал ихьтин жуьредин ктабар мадни хкатнава: “Мерд Алидин “Фу” поэма чирун”, “Гьаким Къурбанан эсеррай адетдинбур тушир тарсар”, “IХ классда хайи литературадикай малуматар” ва мсб.
Чи школайра и ктабдикай менфят къачуз жедай муаллимар самбар ава, амма гьайиф хьи, ам 300 экземплярдин кьадарда аваз акъуднава.
Ктаб пуд кьиликай (“Гьаким Къурбанан гьикаят”, “Гь.Къурбанан романар мектебда”, “Классдилай къеце кIвалах” ва ишлемишай чешмейрин сиягьдикай ибарат хьанва.
Авторди къейднава:
— Литературадин эсеррин куьмекдалди за аялриз литературадин чIал чирзава, абурун рахунрин ва кхьинрин чIал гегьеншарзава, девлетлу ийизва. Лезги чIалан гуьзелвал, ам хуьн лазим тирди чи гзаф зарийрин эсеррай аквазва. Зун Гьаким Къурбанан эсерар аялриз дериндай чирунал, адан романрай адетдинбур тушир тарсар гунал, аялриз художественный эсеррин куьмекдалди хайи Ватандин тарих чирунал, жуван методика арадал гъунал ва адакай жуьреба-жуьре мярекатрал райондин, республикадин муаллимриз суьгьбетар авунал машгъул я. Гь.Къурбанан гзаф эсерар лезгийрин тарихдиз талукьбур я…
Дагъви Шериф
