СтIал Сулейманан районда, педагогвилин зегьметдин ветеран Мегьамед-Садикь Къурбанов рикIел хкунин лишан яз, волейболдай 1-турнир кьиле фена. Ам ЦIийи Макьарин юкьван школадин спортдин майдандал Къурбановрин хизандин теклифдалди ва карчи Муртузали Муртузалиеван пулунин такьатрин куьмекдалди тухвана.

КIелунинни тербиядин рекьяй хуьруьн юкьван школадин директордин заместителдин къуллугъдал алаз, Мегьамед-Садикь Мегьамедовича вичин савадлу вири уьмуьр хайи школадиз бахшна. Ада урус ва лезги чIаларинни литературадин тарсар гана. Гьа са вахтунда ам спортдални машгъул хьана­, районда спортдин кIва­лах вилик тухуник ла­йихлу пай кутуна. Хейлин йисара М.-С.Къур­банов хуьруьн волейболдин командадик кваз къугъвана, райондин ва республикадин дережада тухвай гзаф турнирра гъалиб­вилер къачуна. Гьа са вахтунда тежрибалу муаллимди — гьевеслу спортсменди са шу­муд кас хъсан волейболистарни гьазурна.

Турнир ачухунин мярекатда райондин кьил Нариман Абдулмуталибова, райадми­нистрациядин, спорткомитетдин, ДЮСШ-дин векилри, Россиядин шегьеррай хтанвай мугьманри, цIудралди хуьруьнвийри иштиракна. Хуш келимаяр ра­хайдалай ­к­ьу­лухъ, савкьат яз, Н.Абдулмуталибова спортсменриз тупар багъишна. Турнирдин иштиракчийри райондин кьилиз чухсагъул лагьана.

Тебрикдин келимаяр мярекатдал М.-С. Къурбанован мукьва-кьилийри, ЦIийи Ма­кьа­рин АСП-дин кьил А.Къазиагьмедова, 1-нумрадин ДЮСШ-дин директор М.Къазанбегова, райондин спортдин, туризмдин ва жегьилрин крарин рекьяй комитетдин директор Н.Эфендиева ва масабуру лагьана.­

Къизгъиндаказ кьиле фейи акъажунра Кьасумхуьруьн командади 1-чка кьуна. 2,3 ва 4-чкаяр, талукь тирвал, ЦIийи Макьа­рин, Мегьарамдхуьруьн райондин Гъепцегьрин ва Кьулан СтIалрин командайри кьуна.

Турнирдин иштиракчийриз  кубокар, медалар, грамотаяр, гьакIни турнирдин спонсоррин патай пулдин пишкешар гана.

Хазран Кьасумов