Мукьвара “Садра” издательстводи Исламдин культура ахтармишдай Ибн Синадин тIварунихъ галай фондунин куьмекдалди “Тарих Мискинджа”  хроника урус чIалал кьилдин ктаб яз чапдай акъуднава.

РикIел хкин, “Мискискарин тарих” 2009-йисан августдин вацра Докъузпара райондин Мискискарин хуьре Дагъустандин илимрин центрадин тарихдин, археологиядин ва этнографиядин Институтдин ва ДГУ-дин археографиядин экспедициядин членриз (руководитель — профессор А.Р. Шихсаидов)  жагъана. Абурун арада профессор Замир Закарияевни авай. Адан “Мискискарин тарих” тIвар алай еке макъала алай йисуз чи газетдиз акъатнай.

Къейд ийин хьи, гъилин хатIарин чешмедин текстер ахтармишайла тайин хьайивал, тарихдин и хроникадихъ илим патал еке къиметлувал ава. Адан кьетIенвилерикай сад ам я хьи, ана Дагъустандин тарихдиз талукь гьич са чешмедани мад гьалт тийизвай надир делилар ава.

Урус чIалал акъатнавай ктабда чешмедин бязи малуматриз талукь тарихдин ва филологиядин баянарни ганва.

Ктаб ДГУ-дин, Дагъустандин илимрин центрадин тарихдин, археологиядин ва этнографиядин Институтдин, ДГУ-дин тарихдин ва шаркь патан медениятдин Центрадин куьмекдалди А.Р.Шихсаидова, З.Ш.Закарияева, А.Р.Наврузова гьазурна.

Чи мухбир