1-февралдиз Дагъустандин здравоохраненидин министр Жамалудин Гьажиибрагьимов Сулейман-Стальский ва Дербент районриз мугьман хьана. Макьсад и муниципалитетрин медицинадин идараяр ахтармишун тир. Идакай “Лезги газетдиз” министерстводин пресс-къуллугъди хабар гана.
ИкI, Сулейман-Стальский районда Минздравдин регьбер центральный азарханадиз килигна. Ада медицинадин и идарадин вири отделенийрин, гьакIни суткадин кьиляй-кьилиз инсанрин сагъламвилин къаравулда акъвазнавай стационаррин ва тадаракрин гьал куьлуь-шуьлуьярни кваз ахтармишна. Жамалудин Гьажиибрагьимова ина зегьмет чIугвазвай пешекаррин кIвалахдиз ва азарлуйриз къуллугъзавай тегьердиз кьилин фикир гана, абурухъ яб акална.
Министр ЦРБ-диз килигзавайла, реанимациядин отделенида къатканвай са итимдин уьмуьрдин юлдашди адавай Россиядин яшайишдин рекьяй страхованидин Фондунин Дагъустан Республикада авай филиалдай ва региондин медико-социальный экспертизадин Кьилин бюродай махсус кровать ва месел алкIанвайбур патал подгузникар къачуз куьмек гун тIалабна. Министрди и месэлайрай куьмек гун хиве кьуна.
Минздравдин регьбердихъ галаз кьиле фейи суьгьбетда азарлу са дишегьлиди ина медицинадин къуллугърин ери усалди тирди, хейлин дарманар вичин пулдихъ къачурди лагьана. ЦРБ-дин кьиле авай касдин гафаралди, дарманрал гьалтайла, гьалар са акьван пайгарзавач. Идахъ галаз алакъалу яз, министрди мукьвал вахтара и месэла гьялунин, азарлуйрив алай аямдин истемишунрив кьур ва пулсуз къуллугъар агакьарунин тапшуругъ гана.
Къенин юкъуз Сулейман-Стальский районда саки 55 агъзур кас яшамиш жезва. Ина медицинадин 30 объект эцигна ва капитальнидаказ ремонтна кIанзава. Абурук ФАП-ар, фельдшервилин пунктар ва амбулаторияр акатзава. Минздравдин кьилин гафаралди, алай йисуз Герейханован хуьруьн азархана ремонтун пландик кутунва.
И юкъуз Дербент райондин Геджух хуьруьн азарханани бейхабардиз ахтармишна. Ана 46 касди чпин сагъламвал мягькемарзавай. Азарлуйри министрдиз ина медицинадин лазим тир вири къуллугъар агакьарзавайди ва раб-дарманрал гьалтайлани, четинвилер авачирди лагьана.
«Лезги газет»
