Туьквендай къачур метягь, элкъуьрна вахкудайла кьабул тахвуртIа, вуч авун лазим я? Газдин тешкилатди кIвал газдик кутунин вахт яргъал вегьезватIа, вуч авун лазим я?
Гьи дуьшуьшда ФАС-диз (Федеральная антимонопольная служба), гьи дуьшуьшда Роспотребнадзордиз арза авун герек я?
ФАС-дин ихтияррик антимонополиядиз, рекламадиз, затIар маса къачуниз талукь къанунрал амал авунал гуьзчивал тухун акатзава.
Роспотребнадзордин ихтияррик санитариядинни эпидемиологиядин хилерал гуьзчивал тухун, санитариядинни эпидемиологиядин къайдаяр ва гигиенадин нормативар туькIуьрун, гьавадин, цин, накьвадин гьалар чирун, муьштерийрин ихтиярар хуьн, недай-хъвадай затIарин хатасузвилин месэлаяр акатзава.
— Эгер туьквенди метягь элкъвена кьабул хъийизвачтIа, Роспотребнадзордиз арза ийиз жеда.
— Эгер газдин идаради кIвал газдик кутунин месэла энгеларзаватIа, ФАС-диз арза ийиз жеда.
— Эгер туьквенда метягьдал кхьена къалурнавай къиметдин кьадар сад, амма кассадал масад хьайитIа, идан гьакъиндайни Роспотребнадзордиз арза ийиз жеда.
— Эгер тешкилатри-конкурентри икьрардалди метягьрин ва я къуллугърин къиметар хкажнаватIа, ФАС-диз арза ийиз жеда.
— Эгер квез метягьдин ери хуш хьаначтIа, Роспотребнадзордиз арза ийиз жеда.
— Эгер рекламада метягьдин патахъай са жуьредин баянар, амма гьакъикъатда эсиллагь маса жуьрединбур хьайитIа, ФАС-диз арза ийиз жеда.
Анжах са рекьиз
Дидевилин капиталдин такьатар вири санлай са сеферда гьи дуьшуьшда ишлемишиз жеда? Жаваб: анжах яшамиш жедай кIвал маса къачудайла.
И кар кьилиз акъудунин къайда ихьтинди я: жуваз кIанзавай, жував кьазвай квартира (хсуси кIвал, чил) жагъурун герек я. И дуьшуьшда къиметдин пай яз сертификатдин такьатрин гьисабдай гьакъи гунал кIвалин сагьиб рази хьун важиблу я. Гуьгъуьнлай амукьзавай муькуь пай авансдин еринда вахкунин чарар-цIарар туькIуьрда.
И кар кьилиз акъудун патал МФЦ-диз фена кIанда. Ана пешекаррин куьмекдалди дидевилин капиталдин такьатар ишлемишуналди кIвалин ихтиярар маса къачузвайдаз талукьарунин документ туькIуьрда. Идалай кьулухъ ЕГРН-дай муьштеридин тIварцIихъ выписка къачун патал а документар регистрациядин палатадиз рекье твазва.
Гуьгъуьнлай капиталдин такьатар юзан тийидай эменни маса гузвайдан счетдиз ракъурун патал ПФР-диз арза вугузва. Арзадиз килигайдалай кьулухъ Пенсийрин фондуни дидевилин капиталдин такьатар виликан хсусиятчидин (маса гайидан) счетдиз ракъурзава. Маса къачунвай квартира (кIвал, чил) дидевилин капиталдин сертификатдин иесидин хсусият яз тестикь жезва.
«Лезги газет»
