И йикъара Махачкъалада, Россиядин Дагъустан Республикада авай УФСИН-дин (Управление Федеральной службы исполнения наказаний) УИИ-да (Уголовно-исполнительная инспекция) «Россиядин Федерацияда пробациядин гьакъиндай» Федеральный закон уьмуьрдиз кечирмишунин сергьятра аваз, пробациядин месэлайриз талукь яз ведомствойрин уртах совещание кьиле фена.
Кьилди къачуртIа, ана Россиядин РД-да авай УФСИН-дин УИИ-дин начальник Сайибат Абасовади, адан заместитель Анфиса Кабуловади, Махачкъаладин чIехи яшара авай агьалийрив ва инвалидрив яшайишдин рекьяй къуллугъар агакьардай центрадин директордин заместителдин везифаяр тамамарзавай Раида Суфидавудовади, Дагъустандин Адвокатрин палатадин вице-президент Бакри Бакриева, яшайишдин адаптациядин рекьяй «Гьакъикъат» центрадин регьбер Али Алиева, «Республикадин хизанриз ва аялриз яшайишдин рекьяй куьмекар гудай центр» ГКУ-дин пешекар Шаризат Рамазановади, Дагъустандин Муфтиятдин векил Мегьамед Къурбандибирова, гьакIни УИИ-дин Махачкъалада авай филиалрин пробациядин дестейрин старший инспекторри иштиракна.
Совещанидин иштиракчийри пробациядин, яни чпин гьакъиндай уголовно-правовой жуьредин маса къайдайрикай менфят къачуналди, азадвиликай магьрум авуналди ва я мажбурвилелди тир кIвалахар кьилиз акъудиз туналди жазаламишнавай ксар дустагърай экъечIайла, жаза чIугун алатайла, абур уьмуьрдин четин шартIарай экъечIунихъ, гьа гьисабдай яз ресоциализациядин (инсан цIийи обществодив вердиш хьун), яшайишдин рекьяй адаптациядин ва реабилитациядин месэлайрайни, ахьтин ксарин ихтиярар ва закондин итижар хуьнихъ элкъуьрнавай са жерге серенжемар галай-галайвал веревирдна. ИкI, абуру къейд авурвал, ихтилат физвай категориядин агьалийриз мукьва-кьиливилин алакъаяр арадал хкунин, кIвалахдалди, яшамиш жедай чкадалди таъминарунин, юридический месэлайрай ва икI мад куьмекар гуда. Пробациядин серенжемар анжах гуьгьуьллубуруз талукь яз кьиле тухуда.
Бакри Бакриева къейд авурвал, республикадин Адвокатрин палата чпин жигьетдай пробация кьиле тухузвай ксариз яшайишдинни праводин месэлайрай пулсуздаказ меслятар гуз гьазур я.
— Чпиз талукь яз пробация кьиле тухузвай ксариз ихтияррин рекьяй куьмек гун, и жигьетдай савадлувал хкажун алатай йисуз республикадин Адвокатрин палатади ва Россиядин Дагъустан Республикада авай УФСИН-ди саналди кIвалахунин жигьетдай кутIуннавай икьрардин кьилин хилерикай сад я, — къейдна ада.
Совещанидин нетижа кьуналди, адан иштиракчияр — пробацияда иштиракзавай субъектар — ихтилат физвай ксарин гьакъиндай кьабулдай серенжемар сад-садан гуьгъуьналлаз, тайин къайда хвена, кьилиз акъудунин теклифдихъ галаз рази хьана.
УИИ-дин начальник С.Абасовади къейд авурвал, гьукумат патал чIехи важиблувал авай пробациядин месэла агалкьунралди кьилиз акъудун адан (пробациядин) жуьреба-жуьре субъектри кIвалах хъсандиз ва саналди кьиле тухунилай, и жигьетдай кьабулзавай дуьз къараррилай ва серенжемрилай аслу я.
Рагнеда Рамалданова
