Чеб хайи ерийривай яргъа-Чеб хайи ерийривай яргъа- ра аваз, амма абурун къайгъуйривай яргъаз тежезвай хейлин жумарт рухвайрикайни рушарикай чи газетда муштулухринни тебрикрин чарар, малуматар чапзава. ИкI, и мукьвара чун миграгърин хтул, карчи хва Исмаилов Тарланан мергьяматлувилин крарикай раханвай. А чарчин зенд (баян) хьиз, гила чав Кьурагь райондин Моллакент хуьряй (ам Белиж станциядин патав, Каспий гьуьлуьн къерехда экIя хьанва) са десте ксари кхьенвай чар агакьна. Ана къалурнавайвал, и хуьруьнви Мирзе Мирзеханович Мирзоева (шикилда) вичин багъри муг, хуьруьнвияр садрани рикIелай алудзавач.Кьисметди ва вичин дурумлу зегьметдини чирвилери ам алай девирда къуллугърин, жавабдарвилинни ихтибаррин вини мертебайриз акъуднава. Юкьван школа акьалтIарна, Ленинграддин (гила Санкт-Петербург) лесотехнический академиядиз имтигьанар вахкуз фейи ам кьисметди гьа кеферпатан меркездин лап гьуьрметлу агьалийрикай садаз элкъуьрна.Академия дерин чирвилералди акьалтIарайдалай кьулухъ ада гьуьлерин авиацияда къуллугъна. Хтана, мад вичи кIелай шегьердин са районда агьалийрин яшайишдин кIвалериз къуллугъдай хиле кIвалахдик экечIна. Ина эвленмиш хьана, хизан кутуна. Яваш-яваш Мирзе Мирзехановичан алакьунрин еришар ва ерияр саки вири шегьерэгьлийриз раиж хьана.Перестройкадин гарари басрухар тIимил ганачтIани, ада вичин кар давамарна. Ада хсуси кархана (эцигунрин фирма) арадал гъана. Нетижайри чеб вилив хуьз тунач, ленинградвийри Мирзе Мирзеханович шегьердин Собранидиз депутатвиле хкяна. Ихтибар чIехи хьунихъ галаз сад хьиз, жавабдарвални артух хьана.Амма са кар тайин я: чIехи ихтибарди ва мумкинвилери чи хцик кIусни лавгъавал кутунач. Ам Россиядин кеферпатан регионда авай саки вири лезгийриз чида, яни чи ватанэгьлийри ана тешкилзавай гзаф крарин куьмекчийрикай садаз элкъвенва.Чаз ам, багъри хьиз, генани артух хуш хьунин себеб ам я хьи, лувар гужлу хьанва лагьана, Мирзе Мирзехановичан рикIелай вич Моллакент хуьруь чIехи авурди алатнавач. Гьар мумкинвал хьайила, ам хайи юрдарал кьил чIугваз хквезва, хуьруьз ва хуьруьнвийриз мергьяматдин гъил ачухзава. Хуьруьн кьилин куьчеда, шегьредилай мектебдиз кьван, къир цана, къулайди авун, мектебдин аялриз кIелдай шартIар артухариз куьмекун, яшлубур патал къулай ким ва кьур эцигун, девирди истемишзавайвал, несилрик имандин ерияр кутунин мураддалди мискIин эцигун, хуьр, иллаки цIийи магьлеяр экуьналди таъминарун патал цIийи трансформатор къачуна хкун, кардик кутун-ибур чна гьисабзавай гьеле тIимил крар я.Ихьтин рухваяр авай халкь садрани я кесиб, я ажуз жедач…И чарчихъ Моллакент хуьряй чаз кхьизвай Ибрагьимов Саидан тебрикдин шиирарни гала:
Вуч уьмуьр я пудкъад йис ваз,Чандихъ сагъвал — гул авайла!Къвалав къени хизан галаз,Дигай, чими къул авайла!
Гьа икI шаддиз, тади квачиз,Яшамиш хьухь мадни гьакьван!Амалдалди, дамах гвачиз,Дережаяр кIудиз кьакьан!
Депутатвал яни герек,Эгер туштIа крар зирек?Чаз аквазва — хва я эркек!Вун — чи дестек, вун — чи эрк, экв.
Мектебдиз фир гьар аялдиНа туькIуьрай рекьяй шегьреЛугьузва Ваз пак рикIелди:“Сагъ хьурай вун, буба Мирзе!”
Жемят патал ви пай квачирАвач хуьре гьич са кIвалах.Баркалла ваз, кьегьал хва чи,Кьилел хьуй ви ЧIехи Аллагь!..Чун гъавурда акьурвал, и йикъара Мирзе Мирзеханович Мирзоеван — Санкт-Петербург шегьердин Собранидин депутатдин (ам гилани шегьерэгьлийрин яшайишдин шартIар виликди тухунин месэлайрал машгъул я) 60-йисни тамам жезва. Хуьруьнвийрихъ галаз санал адаз юбилей чнани тебрикзава:
Къуй, Нева хьиз, ви гьар гьунарХьурай экверик.Акурай ви агалкьунарЧIехи уьлкведиз!Ви дагъвивал, ви милливалТахьурай зайиф!Алхишзава чи чили вазДатIана югъ-йиф.
Мерд Али Жалилов
