Республикадин “100 мектеб” проектдин сергьятра аваз, алай йисуз Дагъустанда бюджетдин ва бюджетдилай къецяй тир такьатрихъ 130-далай гзаф мектебар ремонт ийидайвал я. Идакай ТАСС-ди хабар гузва.
И йикъара РД-дин экономикадин ва мулкар вилик тухунин министерствода “100 метеб” проектдин сергьятра аваз арзаяр хкягъунин конкурсдин комиссиядин заседание кьиле фена. Ведомстводин пресс-къуллугъдин кьил З.Уразаевади малумарайвал, конкурсдиз 40 муниципалитетдай 144 арза атана, абуру санлай 376,6 миллион манат тешкилзава, идакай 77,5 миллион манат бюджетдилай къецяй тир такьатар я. Заседанидин нетижада 136 мектебдин арзаяр гъалиб хьана, абур цIи ремонт ийидайвал я.
ТIвар кьунвай проект РД-дин Кьил Владимир Васильеван теклифдалди 2018-йисалай кьилиз акъудзава. Такьатар ахъаюник муниципалитетарни, хсуси инвесторарни экечIзава. И проектдай 2018-йисуз республикадин 117 мектеб тамамвилелди ремонтна, алатай йисуз лагьайтIа, пландик 150 кутунвайтIани, 217 мектеб ремонтдай мумкинвал хьана.
Кьве йисан муддатда 334 мектеб ремонтун патал республикадин бюджетдай 600 миллион манат чара авуна, муниципальный районрин ва шегьеррин округрин бюджетрай — 93,8 миллион манат, хсуси инвесторрин — 213,5 миллион манат.
РД-дин гьукуматдин председателдин заместитель — образованидинни илимдин министр Уммупазил Омаровади мартдиз гегьенш заседанидал малумарайвал, республикада 1460 мектеб ава, абурукай 134 авариядин гьалда ава, 98 лап куьгьнебур я, 480 мектебди ремонт истемишзава. Республикадин мектебра 400 агъзурдав агакьна аялри кIелзава. 2,6 агъзурдалай гзафбуру пуд лагьай сменада чирвилер къачузва.
«Лезги газет»
