Дагъустандин мектебра 3 сменада кIелун арадай акъудунин макьсаддалди 2024-йисалди цIийи 20 мектеб эцигдайвал я. Саласа юкъуз РД-дин Гьукуматдин Председатель Абдулмуслим Абдулмуслимован регьбервилик кваз Махачкъалада кьиле фейи совещанидал малум хьайивал, алай вахтунда республикада 33 мектебда аялри 3 сменада кIелзава.
РД-дин премьер-министрдин гафарай малум хьайивал, 3-сменада кIелзавай аялрин кьадар, санлай къачурла, 7 агъзурдав агакьзава, абурукай 4 агъзурни 400 сифтегьан классрин ученикар я. А.Абдулмуслимова къейд авурвал, эхиримжи пуд йисан къене региондин мектебра кIелзавай аялрин кьадар 50 агъзурдан артух хьанва.
Эхиримжи вад йисан къене Дагъустанда кIелдай 22 агъзур чка авай 53 мектеб эцигна. Амма 3-сменада кIелун гьелелиг арадай акъудиз хьанвач. Себебни мектебра кIелзавай аялрин кьадар йисалай-суз артух хьун я.
Совещанидал РД-дин образованидин ва илимдин министрдин везифаяр вахтуналди тамамарзавай Яхья Бучаева хабар гайивал, 2024-йисалди акьалтIарзавай 20 мектебдикай 10 — Махачкъалада, 3 — Хасавюрт районда, 2 — Каспийскда ва Табасаран, Докъузпара, Леваша, Ахцегь районрани Хасавюрт шегьерда (гьар сана — 1) эцигда.
Чи мухбир
