Гъавурда гьатзавайвал, къиметар ужуз хьунин себеб ам я хьи, суьрсет гьасилзавайбуруз, мекерадин къайдадикай менфят къачуна, чпи гъанвай шей арачияр галачиз маса гудай мумкинвал хьана. Гьелбетда, и кардилай гьам шей маса гузвайбур, гьамни муьштерияр рази я. Иллаки — недай суьрсетдин къиметар багьа хьанвай алай вахтунда.
Ихьтин мярекатар мукьвал-мукьвал кьиле тухунин важиблувал екеди тирдакай мярекатдиз атай, РД-дин Гьукуматдин Председателдин заместитель Абдулмуслим Абдулмуслимовни РД-дин хуьруьн майишатдин ва недай суьрсетдин министр Баттал Батталов галаз алишверишдин майдандал маса гузвай суьрсетдиз килигай, чилел зегьмет чIугвазвайбурухъ галаз суьгьбетар авур вахтуналди республикадин Кьилин везифаяр вахтуналди тамамарзавай Сергей Меликовани къейдна.
Региондин регьберди хуьруьн майишатдин суьрсет гьасилзавайбур алишвериш кьиле тухудай чкаяр тешкилун ва тадаракламишун патал лазим тир вири шейэралди таъминариз гьазур тирдакай лагьана.
“Машмашрин фестивалди чаз ихьтин мекераяр кьиле тухунин нетижалувал тестикьарна. Лежберар шегьерриз къвезва, чпи гьасилнавай шей маса гузва, гьа са вахтунда арачийрин иштираквал авач. Ихьтин майданрин игьтияж таза суьрсет маса къачузвай муьштерийрин арадани екеди я. ИкI, кьве терефни рази я — маса гузвайбурни, къачузвайбурни. Гьаниз килигна, чна ихьтин мярекатар вахт-вахтунда кьиле тухун кьетIнава. Чи пландик алишверишдин дезгеяр туькIуьрун, маса гузвайбур терезралди, кассадин аппаратралди таъминарун ква”, — лагьана С.Меликова. Ада гьакIни Дагъустанда гьасилзавай суьрсетдихъ региондилай къецепатани игьтияж авайди нубатдин сеферда къейдна.
Абдулмуслим Абдулмуслимова къейд авурвал, алай йисуз республикада майвайрин ва емишрин, гьакIни маса культурайрин хъсан бегьерар гуьзлемишзава. Ида недай суьрсетдин жигьетдай хатасузвал таъминарда ва къиметар багьа хьунин вилик пад кьадай мумкинвал гуда. Ада гьисабзавайвал, хуьруьн майишатдин мекерайри и кардик виле акьадай хьтин пай кутазва.
“Дагъустандин Кьилин тапшуругъдалди чна недай суьрсетдин базардин къиметар датIана ахтармишзава. Къенин юкъуз чи къиметар виридалайни агъузбур я. Месела, са килограмм лапагдин як 300-320 манатдай маса къачуз жезва, шегьердин базарда лагьайтIа, 400-лай ужуз жагъидач. Картуфрин, ципицIрин, малдин якIун ва маса суьрсетрин къиметарни базардинбурулай ужуз я. Гьа са вахтунда ерини — лап хъсан”, — лагьана ада. Гьукуматдин векилри къейд авурвал, мекераяр вахт-вахтунда тухудайвал я, иллаки — шегьеррин инсанар къалиндаказ яшамиш жезвай районра. Идалайни гъейри, Дагъустанда гьамиша кардик жедай агропромышленный парк арадал гъунин месэладизни килигзава.
“Чна Махачкъалада мекераяр гьар вацра тешкилзава. Дагъустандин Кьили чал абур гьар 10 йикъалай садра кьиле тухун тапшурмишнава. Гележегда чна лазим тир вири къурулушарни галай агропромышленный парк ачухда. Ана фермерривай чпи гьасилзавай шей, артухан къиметар эхциг тавуна, гъиляй-гъилиз гьар юкъуз маса гуз жеда. Исятда чна и месэладал кIвалахзава”, — лагьана А.Абдулмуслимова.
Малум хьайивал, республикадин шегьеррин властри мекераяр кьиле тухун патал алишверишдин майданар тайинарун, анра санитариядин жигьетдай кутугай шартIар арадал гъун лазим я.
«Лезги газет»
