Вад йис идалай вилик гьуьлуьн дережадилай 1,5 агъзур метрдин кьакьанда авай дагъда, Дагъустандин кьиблепата, Хуруьгрин хуьре аялар савадлу авунихъ элкъуьрнавай “Люминари” центр пайда хьана.
Алатнавай и вад йисан вахтунда центрадиз 120 резидент — гьар жуьредин хилерай тир пешекарар атана. Абурун куьмекдалди аялри хуьруьн сайт, документальный, художественный ва анимациядин фильмаяр, репортажар, сегьнеяр эцигна, мультфильмаяр хайи чIалал таржума, ктабар, журналар верстка авуна, лезги эпосдин игитрин шикилар 3D- къайдада яна, телеграмда бот-гид арадал гъана, Москвада кьиле фейи выставкада иштиракна. Центрада гьакIни вахт-вахтунда тарсарни кьиле тухузва.
Вичин 5 йис тамам хьун “Люминари” центради 12-майдилай 15-майдалди кьиле фейи суварин мярекатралди къейдна. 12-майдиз Алина Василенкоди Махачкъаладин культурадин ТЕМП тIвар алай имаратда “Аялдин личность азаддаказ арадал гъун: Дагъустандин дагълара авай Люминаридин тежриба” темадай лекция кьиле тухвана. Мярекат Ахцегь райондин макьамрин кIватIал (альбом) раиж авуниз талукь концертдалди акьалтIарна. Ам, къейд ийин, Люминаридин аялри музыкадин Ored Recordings маркадихъ галаз экспедиция тамамарзавай вахтунда кхьенай. Концертда Нальчикдай тир махсус мугьманди — музыкадин Джэрпэджэж (Jrpjej) дестеди иштиракна.
Лишанлу йикъахъ галаз алакъалу мярекатар Хуьруьгрин хуьре давам хьана. 14-майдин пакамахъ савадлувилихъ элкъуьрнавай проектрин руководителри “Савадлувилихъ элкъуьрнавай аслу тушир проектар гьихьтин четинвилерал гьалтзава” месэладай конференция кьиле тухвана. Идалай кьулухъ хуьре Лезгийрин СтIал Сулейманан тIварунихъ галай театрдин “Дахдин цIийи свас” тамаша къалурна. И югъ тамамдаказ аялар патал мярекатриз талукьарнавай: пешекарри мастер-классар ва активнидаказ кьиле тухудай серенжемар гьазурнавай. “Люминари” центрадиз и юкъуз Ахцегь райондин мектебрай вишелай артух аялар мугьман хьана. Нянрихъ Хуьруьгрин медениятдин кIвале, Ахцегьрин, Хуьруьгрин ва Нальчикдин музыкантрин иштираквал аваз, лезги ва черкес халкьарин музыкадин концерт кьиле фена.
Суварин кьилин югъ15-май Luminary кубок патал футболдай турнирдин финал кьиле тухунилай башламишна. Ам, къейд ийин, Луткунрин командади къазанмишна. “Люминари” центрада мугьманар ачух суфрайралди, лезги макьамралди, милли сенятрин майдан ачухуналди къунагъламишзавай. Алиса Акимовадин идарадик квай “Алпан” ансамблди, кьуьлер авуналди, чпин гьунарар къалурна, шаирар Сулейман Сулейманова, Жамиля Гьажиевади, Владик Батманова, Мегьамед Ибрагьимова мугьманриз чпин шиирар кIелна. Идалай гуьгъуьниз мугьманар “Люминаридикай” документальный фильмайриз килигна, Светлана Мелентьевади роялдал тамамарай классикадин музыкадихъ яб акална, лишанлу югъ къейдзавай “Просвещение” фондунин президент Магьмуд Абдулжелилович Абдулкеримоваз тебрикар авуна.
Ж.Саидова
